İrkutsk vilayətində meşəyə getmək tamamilə qadağan edilib
Bakı, 8 may, AZƏRTAC
Rusiya Federasiyasının İrkutsk vilayətində meşə yanğınlarının kütləvi şəkildə yayılması səbəbindən meşəyə getmək tamamilə qadağan edilib. Meşəyə nəqliyyat vasitələri ilə getməyə də icazə verilmir.
AZƏRTAC İRK.ru saytına istinadla xəbər verir ki, İrkutsk vilayəti Meşə Təsərrüfatı Nazirliyi üzrə müvafiq əmrin qüvvədə olduğu müddətdə yollar bağlanacaq, nəzarət-buraxılış məntəqələri təşkil ediləcək.
Mayın 9-dan 14-dək qüvvədə olacaq əmrə əsasən, 18 meşə təsərrüfatı idarəsinin ərazisində yanğın təhlükəli işlərin bütün növləri məhdudlaşdırılıb.
Məhdudlaşdırma tədbirləri dövlət hakimiyyəti orqanlarının və yerli özünüidarə orqanlarının vəzifəli şəxslərinə, meşələrin qorunması, müdafiəsi və yeniləşdirilməsi üzrə işlər aparan ixtisaslaşdırılmış müəssisələrin əməkdaşlarına və meşə sahələrindən istifadə edən şəxslərə şamil olunmur.
“İrkutsk Hidrometeorologiya və ətraf mühitin monitorinqi idarəsi” Federal Dövlət Büdcə İdarəsinin proqnozlarına görə, yaxın iki gün ərzində vilayətin cənub, qərb və mərkəz rayonlarındakı meşələrdə 4-cü və 5-ci dərəcəli yanğın təhlükəsi gözlənilir. Bəzi yaşayış məntəqələrinin əhalisi təxliyə ediləcək.
Bölmənin digər xəbərləri
