İrpendə akademik Zərifə Əliyeva adına “Linqvist” liseyinə Azərbaycan dili fənni üçün dərsliklər verilib
İrpen, 15 yanvar, AZƏRTAC
Azərbaycan dövləti İrpen şəhərində yerləşən akademik Zərifə Əliyeva adına 12 nömrəli “Linqvist” liseyinin Azərbaycan dili fənni üçün dərsliklər, köməkçi ədəbiyyatlar hədiyyə edib.
AZƏRTAC xəbər verir ki, əvvəlcə Azərbaycanın Ukraynadakı səfiri Seymur Mərdəliyev liseydə Azərbaycan dili fənninin tədrisi ilə tanış olub. Səfir qeyd edib ki, Azərbaycan Prezidenti İlham Əliyevin diqqət və qayğısı nəticəsində müharibə zamanı ziyan görmüş lisey ölkəmiz tərəfindən əsaslı təmir olunub. Bu gün isə növbəti dəfə Azərbaycan dövləti tərəfindən göndərilən dərsliklər və köməkçi ədəbiyyatlar liseyə təqdim edilir.
Daim diqqət göstərdiyinə görə Azərbaycan dövlətinə təşəkkürünü bildirən liseyin direktoru Valentina Antonenko söyləyib ki, müharibə başlayandan sonra Azərbaycan Ukraynaya və İrpenə etibarlı dəstək verən ilk ölkələrdən biri olub. “Biz bir daha əmin olduq ki, Azərbaycan dövləti bizim etibarlı dostumuz və tərəfdaşımızdır”, - deyə liseyin direktoru Valentina Antonenko əlavə edib.
Sonra əməkdaşlıq planları və birgə layihələrin həyata keçirilməsi müzakirə olunub.
Qeyd edək ki, bundan öncə 2023-cü ilin dekabr ayında liseyə dərsliklər, köməkçi ədəbiyyatlar verilmişdi.
Emil Hüseynli
AZƏRTAC-ın xüsusi müxbiri
İrpen
Bölmənin digər xəbərləri
