Respublika iqtisadiyyatının əsas sahələrindən biri olan aqrar sektorda islahatların növbəti ikinci mərhələsi başlanmışdır. Kənd təsərrüfatında indiyədək hansı işlər görülmüş və qarşıda nə kimi vəzifələr durur? AZƏRTAC-ın müxbirinə Kənd Təsərrüfatı Nazirliyindən bildirmişlər ki, islahatların birinci mərhələdə torpaq mülkiyyətçiləri 1218 kollektiv müəssisə, 170 kənd təsərrüfatı istehsal kooperativi, 391 kiçik sahibkarlıq obyekti, 206 kəndli-fermer təsərrüfatı yaratmışlar.

864 min 740 torpaq mülkiyyətçisinə fiziki şəxs statusu verilmişdir. İstehsal olunan kənd təsərrüfatı məhsullarının 98 faizi onların payına düşür. Son beş ildə kənd təsərrüfatı məhsulları istehsallarının həcmi 6,3 trilyon manatadək artmışdır. Ölkəmizdə kartof istehsalı 700 min tonu ötmüşdür.

Bostan məhsullarının istehsalı üç dəfədən çox artmışdır. Ötən il hər hektardan 116 sentner məhsul götürülmüşdür.

Respublikamızda iribuynuzlu heyvanların sayı 189,5 min başa, xırdabuynuzlu heyvanların sayı isə 7 milyon 93,5 min başa çatmışdır.

Aqrar islahatların yenicə başlayan ikinci mərhələsində qarşıda respublikamızın müxtəlif bölgə və rayonlarında aqroservis müəssisələri, emal sənayesi müəssisələri yaratmaq, köhnə müəssisələri modernləşdirmək, kənd təsərrüfatı texnikası alınmasına sərmaye cəlb etmək, torpaq mülkiyyətçilərini öz ətrafında birləşdirən qurumlar formalaşdırmaq, fermerlərə informasiya təminatı xidməti göstərmək, onları bazar iqtisadiyyatının xüsusiyyətləri barədə məlumatlandırmaq kimi vəzifələr durur. Bunun üçün Kənd Təsərrüfatı Nazirliyi yerlərdə müvafiq iş aparır.