İsmayıllı dinamik inkişaf edən bölgələrdən birinə çevrilib
İsmayıllı, 28 may, AZƏRTAC
“Bölgələrdən AZƏRTAC üçün yazırlar”: İsmayıllı ziyalısı Günay Rzayevanın Prezident İlham Əliyevin mayın 26-da rayona səfəri ilə qələmə aldığı “İsmayıllının inkişafında yeni dövr: Prezident İlham Əliyevin səfəri və yeni layihələr” adlı məqaləsini təqdim edirik.
İsmayıllı son illərdə, sözün əsl mənasında, dirçəlir. Bu inkişaf təkcə statistik rəqəmlərlə, iqtisadi hesabatlarla ölçülmür - rayonun küçələrində, kənd yollarında, məktəblərində, səhiyyə müəssisələrində, yeni salınan park və istirahət məkanlarında, fabrik və zavodların fəaliyyəti ilə yanaşı, elə insanların simasındakı ümid və inam hissində də aydın şəkildə özünü göstərir.
Bir vaxtlar sadəcə təbii gözəllikləri və qədim tarixi ilə tanınan İsmayıllı bu gün artıq Azərbaycanın dinamik inkişaf edən bölgələrindən birinə çevrilib. Bu inkişaf təsadüfi deyil - illərlə aparılan ardıcıl və məqsədyönlü dövlət siyasətinin, regionların sosial-iqtisadi inkişafı proqramlarının və ən əsası, ölkə rəhbərliyinin diqqət və qayğısının nəticəsidir.
Prezidentin iştirak etdiyi mühüm tədbirlərdən biri mayın 26-da Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsində görülən işlərlə tanışlıq idi. Bu yol sadəcə asfalt zolaqları deyil - regionların bir-birinə bağlanması, insanların rahat və təhlükəsiz səfəri, turizmin canlanması və yerli sahibkarlığın inkişafı deməkdir. Ulu Öndər Heydər Əliyevin 70-ci illərdə əsası qoyduğu yol bu gün Prezident İlham Əliyevin təşəbbüsü ilə yenilənir. Bakıdan Qəbələyə, Şəkiyə, Balakənə gedənlər daha qısa, daha rahat yolla mənzillərinə çatacaqlar.
Bu yol həm də bölgələrə yeni nəfəs gətirəcək. Kənd təsərrüfatı məhsullarının bazara çıxarılması sürətlənəcək, kəndlərdə istehsal olunan malların daşınması daha asan olacaq, bölgədəki kiçik və orta sahibkarlar üçün böyük imkanlar açılacaq. Bundan əlavə, bu yol turizm marşrutlarının əsas hissəsinə çevriləcək, nəticədə bölgənin mədəni və tarixi məkanlarına maraq daha da artacaq.
Rayonun Topçu kəndində “Azerbaijan Coca-Cola Bottlers” MMC-nin yeni müəssisəsinin açılışı isə xüsusilə mühümdür. Böyük brendin bölgəyə investisiya qoyması təkcə iqtisadi imkanların artması deyil, həm də inamın göstəricisidir. Bu müəssisə həm yeni iş yerləri, həm də yerli əhalinin rifahına töhfə deməkdir.
Uzun illərdir ki, iri istehsal müəssisələri əsasən paytaxt və iri şəhərlərdə fəaliyyət göstərirdi. Lakin artıq bu tendensiya dəyişir - inkişaf paytaxtdan bölgələrə doğru yön alır. Məhz bu baxımdan “Coca-Cola” kimi dünya miqyaslı brendin İsmayıllıda iri istehsal müəssisəsi qurması, çox önəmli və rəmzi hadisədir. Bu addım kəndin potensialına, insan resurslarına və coğrafi mövqeyinə verilən dəyərin bariz nümunəsidir. Kənddə fəaliyyət göstərən belə iri istehsal müəssisəsi gənclər üçün də ümid işığıdır - artıq şəhərə getmədən doğma kəndində işləmək, qurub-yaratmaq mümkündür.
Belə layihələr göstərir ki, dövlətin dəstəyi və özəl sektorun inamı bir araya gəldikdə, hətta ən ucqar kənd belə böyük gələcəyin ünvanına çevrilə bilər.
Səfər çərçivəsində İsmayıllı şəhərində 1296 şagird yerlik "Talıstan" liseyinin yeni binasının açılışı da baş tutdu. Bu, təkcə bir məktəbin açılışı deyil, gələcəyə qoyulan sərmayədir. Liseyin binası Heydər Əliyev Fondunun təşəbbüsü ilə reallaşdırılan “Yeniləşən Azərbaycana yeni məktəb” proqramı çərçivəsində inşa olunub. Müasir təhsil infrastrukturu, geniş sinif otaqları, laboratoriyalar, kitabxana və idman zalları ilə təmin olunan lisey İsmayıllı gəncliyinin biliklə silahlanmasına geniş imkanlar açır. Valideynlər övladlarını etibarla bu məktəbə yollayacaq, müəllimlər isə daha yaxşı şəraitdə təhsil verəcəklər. Bu lisey İsmayıllının sabahı üçün ən gözəl töhfədir. Liseyin açılışı İsmayıllının təhsil sahəsində inqilabi dəyişikliklərin başlanğıcıdır. Burada yetişən gənclər ölkənin gələcək inkişafında fəal iştirak edən, vətənpərvər və bilikli vətəndaşlar olacaq. Hər bir yeni müəllim otağı, hər bir yeni kitab rəfi, hər bir idman zalı İsmayıllının sabahı üçün ən qiymətli yatırımdır.
Prezidentimizin bu səfəri yalnız yeni layihələrin açılışı ilə bitmədi, həm də İsmayıllıya göstərilən diqqət və qayğının, xalqla dövlət arasında möhkəm birliyin və bölgələrin diqqətdə saxlanılmasının parlaq nümunəsi oldu. Biz, İsmayıllı sakinləri olaraq, bu böyük qayğı və diqqətə görə dərin minnətdarlığımızı bildiririk. Ürəkdən inanırıq ki, bu diqqət və dəstək sayəsində rayonumuzun inkişafı dayanıqlı şəkildə davam edəcək, İsmayıllı daha da tərəqqi edəcək və həyat səviyyəsi ildən-ilə yüksələcək. Gələcəkdə də birlikdə daha böyük uğurlara imza atacağımıza əminik.
Bölmənin digər xəbərləri
