“İSR HOLDİNQ” ŞİRKƏTLƏR QRUPUNUN PREZİDENTİ İSGƏNDƏR XƏLİLOVUN ÇIXIŞI
Əziz və hörmətli qonaqlar!
“Park İnn Azərbaycan” mehmanxanasının açılış mərasiminə təşrif buyurduğunuza görə, “İSR Holdinq” adından hamınıza dərin təşəkkürümü bildirmək istərdim.
Mühüm dövlət işlərindən vaxt tapıb bu mərasimdə iştirak etdiyinə görə, möhtərəm cənab Prezident İlham Əliyevə xüsusi minnətdarlığımı bildirirəm.
Öncədən xüsusi qeyd etmək istəyirəm ki, 1995-ci ildə yaranan şirkətimiz məhz ulu öndərimiz, dahi Heydər Əliyevin xeyir-duası ilə fəaliyyətə başlamış və on ildə gördüyümüz işlər xalqın gözü önündədir.
Möhtərəm Prezident!
Əziz qonaqlar!
İndi isə 2005-ci ildə gördüyümüz işlər haqqında qısa məlumat vermək istəyirəm. Ötən il ərzində “İSR Holdinq” Göyçay konserv zavodunda yenidənqurma işləri aparmış, zavodu müasir avadanlıqla təmin etmişdir. Hazırda məhsulumuz “Azplodeksport” brendı altında Amerika Birləşmiş Ştatlarında, Almaniyada və digər ölkələrdə satılmaqdadır. Dünya bazarında bu zavodun məhsuluna artan maraq onlarca yeni müqavilələrin bağlanması ilə nəticələnmişdir. Göyçay zavodunun fəaliyyətə başlaması bir növ zəncirvari reaksiya effekti verərək, yeni istehsal sahələrinin açılmasını zəruri etmişdir.
Məsələ ondadır ki, hazır məhsulun ünvan sahiblərinə çatdırılması üçün o, standartlara uyğun taraya yerləşdirilməlidir. Odur ki, qısa bir zamanda holdinq tərəfindən 4700 kvadratmetr sahəsi olan yeni qofro-karton zavodu və plastmas sexi tikilib istifadəyə verilmişdir.
1983-cü ildən işləməyən Neftçala yod-brom zavodu holdinq tərəfindən özəlləşdirilmişdir və hazırda zavoda yeni avadanlıq gətirilərək, intensiv quraşdırma işləri aparılır. İnşallah, 2006-cı ilin sonuna qədər zavodun bir hissəsində hazır məhsulun buraxılması nəzərdə tutulur. Onu da bildirmək istərdim ki, təkcə Göyçay konserv və qofro-karton zavodlarında bu gün 300-dən artıq insan çalışır.
“İSR Holdinq”in diqqətini cəlb edən sahələrdən biri də otel biznesinin inkişafıdır. Bu strateji xəttin uğurla həyata keçirilməsinin sübutu kimi, artıq 6 ildir ki, şəhərin mərkəzində Bakının qonaqlarına xidmət göstərən 5 ulduzlu “Radisson SAS” və “İSR Plaza” biznes mərkəzini nümunə gətirmək istərdim. Bu xətti davam etdirərək, 2004-cü il sentyabrın 15-də Brüssel şəhərində Holdinqə daxil olan “Qlobal invest” kompaniyası və “Rezidor SAS” Otel İdarəetmə Qrupu arasında Bakının mərkəzindəki “Azərbaycan” mehmanxanasının ikinci korpusunun bərpası və işlədilməsi barədə əməkdaşlıq müqaviləsi imzalanmışdır. Bakının müasir görünüşünə uyğun gəlməyən mehmanxana qısa bir zamanda indi gördüyünüz vəziyyətə gətirilmişdir.
Qürurla demək istəyirəm ki, yenidənqurma işləri holdinqə daxil olan “İSR İnşaat” müəssisəsi tərəfindən aparılmışdır. Bu işlərə 232 azərbaycanlı və 18 xarici mütəxəssis cəlb edilmişdir və cəmi 10 aya başa çatdırılmışdır.
Açılışında iştirak etdiyiniz mehmanxananın 3-cü mərtəbəsindən 11-ci mərtəbəsinədək Xəzər dənizinə, Milli Parka və şəhərin möhtəşəm yerlərinə baxan 248 yeni otaq yerləşir. Hər otaq fərdi havalandırma, seyf, yüksək sürətli xətsiz internet, radio və peyk antenası ilə işləyən televizorla təmin edilmişdir. Birinci mərtəbədə restoran, bar, qəhvə və lobbi salonları yerləşir. İkinci mərtəbədə qısa və uzunmüddətli istifadə üçün nəzərdə tutulan, ən müasir texniki avadanlıqla təmin olunmuş Biznes Mərkəzinin ofis sahələri, görüş və mərasimlərin keçirilməsi üçün 6 ədəd konfrans salonu, habelə 380 kvadratmetrlik böyük salon yerləşir. Kifayət qədər avtomaşın üçün açıq dayanacaq imkanı yaradılmışdır. Mehmanxanada 150-yə qədər işçi çalışır.
Bu gün Azərbaycanda iqtisadiyyatımızın dirçəlişinə, inkişafına yönəldilən sahibkarlıq fəaliyyətinin həyata keçirilməsi üçün hər cür şərait vardır. İstəyirəm ki, bu sabitliyin təminatçısı olan, xalqımızın rifahı naminə əlindən gələni əsirgəməyən möhtərəm Prezidentimizə dərin minnətdarlığımı bildirim.
Əziz qonaqlar!
Mən sizin vaxtınızı çox almaq istəməzdim. Ümid edirəm ki, “İSR Holdinq” tərəfindən istifadəyə verilən istehsalat sahələrinin və mehmanxanaların sırası yaxın gələcəkdə daha da genişlənəcəkdir. Gəldiyinizə görə bir daha təşəkkür edir, Sizi üzümüzə gələn Dünya azərbaycanlılarının həmrəyliyi günü və Yeni il - 2006-cı il münasibətilə ürəkdən təbrik edir, hamınıza cansağlığı, uzun ömür arzulayıram.
Diqqətinizə görə sağ olun.
X X X
Azərbaycan Prezidenti İlham Əliyev mərasimdə nitq söylədi.
Bölmənin digər xəbərləri
