AZƏRTAC-ın xəbər verdiyi kimi, Liviya Cəmahiriyyəsinin lideri Müəmmər Qəzzafi ilə Beynəlxalq Şahmat Federasiyası (FİDE) arasında kişi şahmatçıların dünya çempionatının iyunun 18-dən iyulun 13-dək Tripolidə keçirilməsi haqqında razılıq əldə olunmuşdur. Lakin bu günlərdə İsrail Şahmat Federasiyası bəyanat verərək, çempionatın Liviya paytaxtında keçirilməsinə etirazını bildirmiş və onun İsrailə qarşı düşmən mövqe tutmayan hər hansı digər ölkədə təşkil olunmasını tələb etmişdir.

Federasiyanın mətbuat katibi Tal demişdir: ”Biz çempionatın başqa ölkədə keçirilməsini tələb edirik. Çünki Qəzzafi İsrail barədə “sionist düşmən” sözlərini işlətdikdən sonra, bu, daha şahmat oyunu deyil, başqa oyun olur”.

Liviya lideri M.Qəzzafi isə bu yaxınlardakı bəyanatında İsrail şahmatçılarının Tripolidə yarışmalarına razı olduğunu və onların təhlükəsizliyinə tam təminat verildiyini bildirmişdir.