İstanbul hava limanlarından üç ayda 27,1 milyon sərnişin istifadə edib
Ankara, 22 aprel, AZƏRTAC
2024-cü ilin yanvar-mart aylarında İstanbul və Sabiha Gökçen hava limanlarından ümumilikdə 27 milyon 104 min 54 sərnişin istifadə edib.
AZƏRTAC xəbər verir ki, bu barədə Türkiyə Dövlət Hava Limanları İdarəsindən məlumat verilib.
Bu göstərici ötən ilin eyni dövrü ilə müqayisədə 3,2 milyon nəfər çoxdur. Belə ki, 2023-cü ilin ilk rübündə meqapolisin iki hava
limanından cəmi 23,9 milyon sərnişin istifadə etmişdi.
Məlumatda deyilir ki, cari ilin yanvar-mart aylarında İstanbul beynəlxalq aeroportunda ümumilikdə 17 milyon 671 min 971 sərnişin qeydə alınıb. Bu, da ötən ilin yanvar-mart dövrü ilə müqayisədə 9 faiz çoxdur.
Sərnişin sayı hər il artan Sabiha Gökçen hava limanından isə ilin ilk üç ayında 9 milyon 432 min 83 nəfər yararlanıb. Ötən ilin müvafiq dövründə isə bu aeroportdan 7,7 milyon nəfər, yəni 22 faiz daha az sərnişin istifadə etmişdi.
Türkiyə meqapolisindəki iki hava limanından həyata keçirilən reyslərin sayı da artıb. Belə ki, yanvar-mart aylarında İstanbul hava limanından 120 min 148, Sabiha Gökçen aeroportundan isə 56 min 130 reys həyata keçirilib. Ötən ilin eyni dövrünə nisbətən aviareyslərin sayında müvafiq olaraq 6 faiz və 12 faiz artım qeydə alınıb.
Ankara
Bölmənin digər xəbərləri
