İstanbulda keçirilən forumda Qərbi Azərbaycan həqiqətlərindən danışılıb
Bakı, 31 iyul, AZƏRTAC
İstanbulda “Qərbi Azərbaycan həqiqətləri beynəlxalq müstəvidə” mövzusunda Türkiyə Forumu keçirilib.
AZƏRTAC xəbər verir ki, Qeyri-Hökumət Təşkilatlarına Dövlət Dəstəyi Agentliyinin dəstəyi ilə “Qızılbaş” Gəncləri Maarifləndirmə İctimai Birliyi tərəfindən təşkil olunan forumda açılış nitqi söyləyən “Yeni Çağ” Media Qrupunun rəhbəri Aqil Ələsgər 44 günlük Vətən müharibəsindən sonra işğaldan azad edilən torpaqların Prezident İlham Əliyev tərəfindən təsdiqlənən Böyük Qayıdış Proqramı çərçivəsində canlandırılması, orada həyatın bərpa edilməsi işlərinin uğurla davam etdiyini vurğulayıb.
Sonra çıxış edən Diasporla İş üzrə Dövlət Komitəsinin Aparat rəhbəri Daşqın Rəcəbli, Azərbaycanın İstanbuldakı konsulu Zaur Allahverdi-zadə və Türkiyə-Azərbaycan Dərnəkləri Federasiyası (TADEF) İdarə Heyəti sədrinin müavini Pərviz Məmmədzadə Qərbi Azərbaycan və həmin bölgədən olan soydaşlarımızın qayıdış məsələsinin ciddi aktuallıq qazandığını qeyd ediblər.
TİMBİR-in sədr müavini Adil Koçalan, İSTAD başqanı Səfər Qaraqoyunlu, Türkiyənin hakim AK Partiya Gənclər Təşkilatının xarici əlaqələr üzrə sədri Mustafa Kanyılmaz, Gənclərin Təşəbbüsünə və İnkişafına Dəstək İctimai Birliyinin sədri Toğrul Allahverdili, Qarabağ qazisi Nahid Canbaxışlı da çıxışlarında Qərbi Azərbaycan həqiqətlərindən danışaraq yurdlarından didərgin salınmış azərbaycanlıların evlərinə qayıdış hüququnun təmin olunmasının önəmindən bəhs ediblər.
Çıxışların ardınca Rəşid Mustafazadənin moderatorluğu ilə baş tutan paneldə Mehdi Gəncəli, Venera Mustafayeva və Dilqəm Əhməd tarixi gerçəklərə nəzər salıblar.
Panel müzakirələrindən sonra iştirakçılara plaket təqdim edilib və xatirə fotosu çəkdirilib.
Forum çərçivəsində Qərbi Azərbaycandakı tarixi izlərimizlə bağlı Qərbi Azərbaycan İcması ilə birgə hazırlanmış sərgi nümayiş olunub.
Bölmənin digər xəbərləri
