İsveçin Baş nazirinin mühafizəçiləri fitnes tətbiqi vasitəsilə onun yerini aşkarlayıblar
Stokholm, 9 iyul, Nərgiz Cəfərli, AZƏRTAC
İsveç Təhlükəsizlik Xidmətinin (Säpo) mühafizə xidmətinin əməkdaşları “Strava” adlı fitnes tətbiqi vasitəsilə konfidensial məlumatların sızmasına yol veriblər.
AZƏRTAC xəbər verir ki, “Dagens Nyheter” qəzetinin məlumatına görə, azı 35 halda İsveçin Baş naziri Ulf Kristerssonun hərəkət marşrutları barədə məlumatlar ictimaiyyətləşdirilib.
Qəzet mühafizəçilərdən yeddi nəfərin Strava tətbiqində yerləşdirdiyi 1400-dən çox qeydi təhlil edib. Bu qeydlər vasitəsilə İsveçin yüksək vəzifəli şəxslərinin şəxsi vaxtlarında getdikləri yerləri, yaşadıqları ünvanları və hərəkət marşrutlarını müəyyən etmək mümkün olub.
Məlumat sızmaları bir neçə il ərzində davam edib. Bu məlumatlar yalnız Baş nazir U.Kristerssona deyil, kral ailəsinin üzvlərinə, “İsveç Demokratları” partiyasının lideri Yimmi Okessona, eləcə də keçmiş baş nazirlərə də aid olub.
Məlum olub ki, mühafizəçilərin Strava profilləri açıq olub və onların hərəkətləri istənilən istifadəçi tərəfindən asanlıqla izlənə bilib.
“Bu, ciddi pozuntudur. Belə məlumatların ictimaiyyətə açıq olması yolverilməzdir”, – deyə təhlükəsizlik üzrə ekspertlər hadisəni şərh ediblər.
Säpo artıq həmin hesabları bağlayıb və əlavə tədbirlər görəcəyini bildirib. Xidmətin təhlükəsizlik şöbəsinin rəhbəri Karolina Byornsdotter Paasikivi etiraf edib ki, qurum rəqəmsal məlumatların qorunması ilə bağlı öz qaydalarına əməl etməli idi, lakin bu dəfə buna riayət olunmayıb.
Qeyd edək ki, oxşar qalmaqal daha əvvəl Fransada da baş vermişdi. Belə ki, prezident Emmanuel Makronun mühafizəçiləri də Strava tətbiqində marşrutları aşkar etmişdilər. Həmin vaxt Säpo bu cür tətbiqlərdən istifadə ilə bağlı şərh verməkdən imtina etmiş və metodlarının məxfi olduğunu bildirmişdi.
Baş nazir U.Kristersson isə insidentə münasibət bildirməyib və məsələ ilə bağlı Hökumət Dəftərxanasına müraciət edib.
Bölmənin digər xəbərləri
