İSVEÇRƏ TUNELİNDƏ FACİƏLİ AVTOMOBİL QƏZASI

17.09.2006 [12:20]
Çap et
A⁺ A^-

Sentyabrın 16-da İsveçrə alplarından keçən Viemala tunelində baş vermiş avtomobil qəzası faciə ilə nəticələnmişdir. AZƏRTAC-ın xüsusi müxbiri Almaniya KİV-lərinə istinadla xəbər verir ki, 27 nəfərdən ibarət xokkey komandasının heyətini Tessin şəhərinə yarışa aparan avtobusun tunelin dərinliyində qarşıdan gələn minik avtomaşını ilə toqquşması nəticəsində 6 nəfər hadisə yerində həlak olmuş, 7 nəfər ağır yaralanmış,12 adam müxtəlif dərəcəli bədən xəsarəti almışdır. Ölənlərdən biri minik maşınının sürücüsüdür.

Güclü toqquşmadan alışan avtomaşınlar yanmağa başlamış, tuneli tüstü bürümüşdür.

Hadisə yerinə onlarca polis, yanğınsöndürən və təcili yardım maşınları gəlmişdir. Tunelin daxilində görüntünün zəif olmasına baxmayaraq xilasedicilər od-alovun ağuşuna atılaraq yanan maşınların kilidlənmiş qapılarını açmağa nail olmuş və zərərçəkənləri açıq havaya çıxarmışlar. Yaralılar yaxınlıqdakı ərazilərin xəstəxanalarına çatdırılmışdır.

Polisin dediyinə görə, qəzaya səbəb minik avtomaşınının sürücüsünün tunel daxilində sürəti xeyli artırması olmuşdur.

Tuneldə nəqliyyatın hərəkəti dayandırılmışdır.