İtaliyada mafiyaya qarşı əməliyyatlarda 250 milyon avrodan çox vəsait müsadirə edilib

30.05.2025 [12:57]
Çap et
A⁺ A^-

Roma, 30 may, AZƏRTAC

İtaliyada 2024-cü ildə mafiya qruplarına qarşı keçirilən əməliyyatlarda 250 milyon avrodan çox vəsait və aktivlər müsadirə olunub.

AZƏRTAC xəbər verir ki, bu barədə İtaliya Daxili İşlər Nazirliyinin Antimafiya İstintaq İdarəsi məlumat yayıb. Bildirilir ki, həmin vəsaitin 93 milyon avrodan çoxu kiçik mafiya qruplarına, təxminən 160 milyon avrosu isə strukturlaşdırılmış mafiya qruplaşmalarına qarşı əməliyyatlarda müsadirə edilib. İl ərzində 53 istintaq-əməliyyat tədbiri yekunlaşdırılıb, 309 həbs qətimkan tədbiri seçilib.

Bundan başqa, prefekturalar tərəfindən 760-dan çox antimafiya qadağası verilib, istintaq işləri ilə bağlı ümumilikdə 150 mindən çox hesabat hazırlanıb, onlardan 50 mindən çoxu potensial olaraq mütəşəkkil cinayətlə əlaqəli olub. Bunlar, həmçinin 49 milyard avrodan çox pul dövriyyəsi üçün 1,3 milyondan çox şübhəli maliyyə əməliyyatı axını ilə bağlı olub.

Nihad Budaqov

AZƏRTAC-ın xüsusi müxbiri

Roma