İtaliyanın məşhur universitetində Dağlıq Qarabağ münaqişəsi ilə bağlı müzakirələr aparılıb
Berqamo, 2 iyun, AZƏRTAC
İtaliyanın məşhur Berqamo Tədqiqatlar Universitetində (BTU) Azərbaycanın bu ölkədəki səfirliyinin, Leviko Terme şəhərində fəaliyyət göstərən Azərbaycan Tədqiqatları Mərkəzi (ATM) və Berqamoda yeni təsis edilmiş Xəzər dənizi üzrə Tədqiqatlar Mərkəzinin (XDTM) birgə təşkilatçılığı ilə “Dağlıq Qarabağ münaqişəsi və bugünkü Azərbaycan” mövzusunda “dəyirmi masa” keçirilib.
ATM-in üzvü Maurizio Dell’Antonionun moderatorluğu ilə keçirilmiş tədbirdə qurumun rəhbəri Fernando Orlandi və üzvü Davide Zaffi, BTU-nun dosenti və XDTM-nin rəhbəri Mikele Brunelli və Milan Universitetinin beynəlxalq tədqiqatlar departamentinin aparıcı tədqiqatçısı Alessandro Vitale müvafiq mövzuda məruzələrlə çıxış ediblər.
M.Dell’Antonio bu cür tədbirlərin keçirilməsinin Dağlıq Qarabağ münaqişəsi ilə bağlı həqiqətlərin İtaliya ictimaiyyətinə çatdırılmasında önəmli olduğunu diqqətə çatdırıb. Bildirib ki, son illərdə İtaliyada Cənubi Qafqaza, xüsusilə də Azərbaycana maraq getdikcə artmaqdadır. O, bu baxımdan ATM-in təşkilatçılığı ilə Azərbaycanın inkişaf tarixi, daxili və xarici siyasəti, Dağlıq Qarabağ münaqişəsi və müxtəlif mövzularda keçirilmiş konfranslardan söz açıb.
Tədbirdə çıxış edən natiqlər Azərbaycanın Cənubi Qafqaz regionunda ən inkişaf etmiş ölkə olduğunu qeyd edərək, onun tarixi, daxili və xarici siyasət prioritetləri, beynəlxalq və regional təşkilatlar çərçivəsində fəaliyyəti, uğurlu enerji siyasəti, həyata keçirdiyi irimiqyaslı layihələr barədə fikirlərini bölüşüblər. Onlar Cənubi Qafqaz regionunun hərtərəfli inkişafına mənfi təsir göstərən yeganə problemin Dağlıq Qarabağ münaqişəsi olduğunu söyləyiblər. Diqqətə çatdırıblar ki, münaqişə nəticəsində Azərbaycan ərazisinin 20 faizi işğal olunub, bir milyondan artıq azərbaycanlı qaçqın və məcburi köçkünə çevrilib.
Çıxış edənlər, həmçinin Xocalıda azərbaycanlılara qarşı törədilmiş cinayətlər və dinc əhalinin qətlə yetirilməsi faktı, Dağlıq Qarabağ münaqişəsinin həlli istiqamətində bu günədək aparılan danışıqlar və mövzu ilə bağlı digər məsələlər ətrafında müzakirələr aparıblar.
Sonda tədbir iştirakçılarını maraqlandıran suallar cavablandırılıb.
Maqsud Dadaşov
AZƏRTAC-ın xüsusi müxbiri
Berqamo
Bölmənin digər xəbərləri
