Jalə Əliyeva: ATƏT-in Minsk qrupu: fiasko ilə üz-üzə
Bakı, 15 dekabr, AZƏRTAC
“Bunu bir daha kameralar qarşısında deyə bilərəm. Mən Minsk qrupunu səfərə dəvət etməmişəm. Lakin mənə məlumat verəndə ki, Minsk qrupu gəlmək istəyir, dedim gəlsinlər, etiraz etmirəm. Bəlkə onların mənə sözləri var. Əgər siz bunu kamera qarşısında söyləmək istəyirsinizsə, buyurun. Əgər istəmirsinizsə, mən onlara deyim getsinlər. Necə istəsəniz”.
Bu sözləri Prezident, Müzəffər Ali Baş Komandan İlham Əliyev üç gün əvvəl ATƏT-in Minsk qrupunun Fransadan və ABŞ-dan olan həmsədrləri ilə görüşdə bildirdi. Bu, çox sərt və çox sərrast, 28 ildir adı olub, özü olmayan, Ermənistan-Azərbaycan münaqişəsini danışıqlar yolu ilə həll etməyi, vasitəçilik missiyasını üzərinə götürən, ancaq ötən illər ərzində mənası, əhəmiyyəti olmayan bəyanatlar verən, əksər hallarda isə işğalçı ilə işğala məruz qalanı eyniləşdirən, bölgəyə, sadəcə, turist səfərləri edən ATƏT-in Minsk qrupunun həmsədrlərinin timsalında adıçəkilən qrupa verilən ən güzgün qiymətdir. Çünki başqa cür ola da bilməzdi, başqa cür dəyərləndirmə mümkün deyildi…
Milli Məclisin deputatı Jalə Əliyeva AZƏRTAC-a açıqlamasında bildirib ki, 28 il öncə ATƏT-in Minsk konfransı kimi yaradılan, sonra Minsk qrupuna çevrilən, 1997-ci ildən isə 3 ölkənin - həmsədr dövlətlərin monopoliyasında olan bu təşkilat bütün gözləntiləri, ümidləri alt-üst etdi. Üzərinə götürdüyü vasitəçilik missiyasını yerinə yetirmədi, haqsızlığa, ədalətsizliyə, təcavüzə, işğala məruz qalan və dünyadan ədalət gözləyən Azərbaycan xalqının növbəti xəyal qırıqlığına çevrildi. BMT Təhlükəsizlik Şurasının 4 qətnaməsinin icrasını tələb etmək və icrasına nail olmaq bir yana, özünün verdiyi bəyanatlara, özünün üzərinə götürdüyü missiyaya, özünün daşıdığı mandata açıq-aşkar hörmətsizlik göstərdi. Qısa zamanda Azərbaycan xalqının haqlı olaraq qəzəb ünvanına, tənqid, istehza obyektinə çevrildi. 28 ildə gəldilər, getdilər, özlərinə “layiq” olan bəyanatlar verdilər, sanki bununla missiyalarını bitmiş saydılar. Hətta ara-sıra ermənilərə vəkillik etdilər, xüsusilə də Minsk qrupunun həmsədri olan ermənipərəst Fransa…Missiyalarını, mandatlarını unutdular, özlərini görməzliyə, bilməzliyə vurdular. Üzərlərinə gedəndə də yaxalarını kənara çəkdilər, “tərəflər razılığa gəlsinlər, biz də dəstəkləyək” dedilər. Daha bilmədilər ki, tərəfləri, xüsusilə, işğalçı və təcavüzkar Ermənistanı razılığa gətirmək, onu sülhə məcbur etmək onların birbaşa vəzifəsi, missiyası idi.
Ancaq etmədilər, etmək istəmədilər, Ermənistanın nazı ilə oynadılar, onun şıltaqlıqlarına, sonu görünməyən cinayətlərinə, sülhə, təhlükəsizliyə birbaşa təhdid yaradan təxribatlarına, fitnəkarlıqlarına göz yumdular. Əvvəlcə status-kvonun qəbuledilməzliyini bəyan etdilər, sonra onun qalmasında ermənilər qədər səy göstərdilər. Bütün yüksək kürsülərdən, üzbəüz görüşlərdən səslənən açıq və ya örtülü, kəskin və ya yumşaq etirazlara, xəbərdarlıqlara da saymazlıq, laqeydlik, biganəlik göstərdilər. Ancaq nəticədə uduzan özləri oldu, uduzan, rüsvay olan açıq-gizli dəstək verdikləri, növbəti işğala iştahalandırdıqları forpost, vassal, terror mahiyyətli Ermənistan oldu. Cəmi 44 günlük tarixi Vətən müharibəsi ilə Ali Baş Komandan İlham Əliyev və onun rəşadətli Ordusu 32 illik münaqişəyə son qoydu. Nə təmas, nə cəbhə xətti, nə status-kvo, nə status, nə də Dağlıq Qarabağ münaqişəsi qaldı... Eləcə də nə ATƏT-ə, nə Minsk qrupuna, nə də onun həmsədrlər institutuna, həmsədrlərə ehtiyac qaldı…Məsələ kökündən həll olundu.
Artıq Minsk qrupu və onun həmsədrlərinin addımları məşhur el məsəlimizdə deyildiyi kimi, toydan sonra nağaradan başqa bir şey deyil… Yaxud da, daldan atılan daş topuğa dəyər anlamını verir… Bizim artıq nə danışıqlara, nə Minsk qrupuna, nə də həmsədrlərə ehtiyacımız var. Bizim öz tənzimləyicimiz - “dəmir yumruğumuz” var. Necə ki, 44 gündə də bu yumruq öz tarixi missiyasını layiqincə yerinə yetirdi… Ədalət Zəfər çaldı. Ermənistan da, onun yanında duranlar da layiqli cavablarını aldılar. Məşhur, “öz cəzandır, çək!” , deyimində olduğu kimi...
Bəli, hörmətli həmsədrlər, öz cəzanızdır, çəkin artıq. Biz çox dedik, amma siz az eşitdiniz və nəticəsi də məlumdur. Prezident İlham Əliyevin sözləri ilə desək: “Ermənistan kapitulyasiya aktına imza atmağa məcbur edildi. Onlar bunu heç vaxt könüllü imzalamazdılar. Biz onları məcbur etdik, Minsk qrupu yox!...Bu, reallıqdır…”
Bəli, biz sentyabrda cavab tədbirlərinə keçdik. Elə cavab verdik ki, onların Ermənistan ordusunu və demək olar ki, erməni dövlətini məhv etdik və ərazimizdə cinayət rejiminə, xunta rejiminə son qoyduq, erməni millətçilərinin üzdəniraq “artsax” xülyalarını dağıtdıq, yox etdik! Artıq bu xülya içi hava ilə dolu şar kimi partlayıb. Nə bu adda bir ərazi var, nə də xülyalar... Paşinyan və tərəfdarları, başda Fransa olmaqla, ATƏT olmaqla səhv etdilər, səhv hesabladılar. Böyük bir fiaskoya uğradılar. Çox mənfi bir imic qazandılar. Bu məğlubiyyətdən sonra çətin bir daha qədlərini düzəltsinlər. Biz Qələbə qazandıq. Haqq Azərbaycanın yanındadır. Hüquq Azərbaycandan yanadır. Qarabağ Azərbaycandır!
Bölmənin digər xəbərləri
