Jurnalistikada süni intellekt texnologiyalarının rolu ilə bağlı tədqiqat aparılıb
Bakı, 10 yanvar, AZƏRTAC
Elm və Təhsil Nazirliyi İnformasiya Texnologiyaları İnstitutunun baş mütəxəssisi Sünbül Zalovanın “Jurnalistikada süni intellekt texnologiyalarının rolu” adlı məqaləsi “Ağıllı mühit və yaşıl texnologiyalar” (International Conference on Smart Environment and Green Technologies – ICSEGT2024) mövzusunda keçirilən beynəlxalq konfransın materiallarında dərc olunub.
Bu barədə AZƏRTAC-a institutdan məlumat verilib.
Məqalədə süni intellekt texnologiyalarının jurnalistikaya tətbiqi ilə bağlı mövcud vəziyyət və jurnalistikanın yeni yaranan media tendensiyalarına inteqrasiyası məsələləri araşdırılıb, süni intellektli çatbotlar, sentiment analiz və ChatGPT barədə ətraflı məlumat verilib. Həmçinin qaydalarla idarə olunan və süni intellektli çatbotların müqayisəli analizi aparılıb. Bundan əlavə, jurnalistikada çatbotlardan istifadənin üstünlükləri araşdırılıb və ChatGPT-ni digər çatbotlardan fərqləndirən xüsusiyyətlər və bu sahədəki mövcud problemlər müəyyən olunub.
CSEGT2024 konfransına qəbul olunmuş məqalələr nüfuzlu “Springer” bazasına daxil olan kitab seriyasında da dərc olunub.
Bölmənin digər xəbərləri
