Kanada nəzəri cəhətdən Avropa İttifaqına daxil ola bilər
Bakı, 21 aprel, AZƏRTAC
Kanadanın Avropa İttifaqına daxil olması ehtimalı az olsa da, bu mümkündür.
AZƏRTAC xəbər verir ki, “Politico” nəşri bu barədə ekspertlərə istinadla məlumat yayıb.
“Abacus Data” tədqiqat şirkəti tərəfindən keçirilən sorğuya əsasən, kanadalıların 44 faizi ölkənin Avropa İttifaqına daxil olmasını dəstəkləyir, 34 faizi isə bunun əleyhinədir.
Ekspertlərin fikrincə, Kanada Avropa İttifaqına daxil olmaq üçün uyğun ölkədir və Avropa dəyərlərinə, institutlarına və siyasətinə hazırkı namizəd ölkələrin bəzilərindən daha yaxındır. Onların sözlərinə görə, rəsmi və hüquqi nöqteyi-nəzərdən “Avropa dövləti” anlayışı sabit deyil və yalnız kontinental Avropa ilə məhdudlaşmır. Avropa İttifaqının bəzi ölkələrinin Karib dənizində, Sakit okeanda və ya Arktikada xarici əraziləri var. Kanadalıları da, müəyyən mənada avropalılar adlandırmaq mümkündür, çünki onların çoxunun kökü Avropaya gedib çıxır. Eyni zamanda, bu ölkə siyasi quruluşunu, hüquq sistemini və demokratik dəyərləri məhz Avropadan götürüb.
Hazırda Avropa İttifaqına üzvlük üçün doqquz ölkə - Albaniya, Bosniya və Herseqovina, Gürcüstan, Moldova, Şimali Makedoniya, Serbiya, Türkiyə, Ukrayna və Monteneqro növbə gözləyir.
Bölmənin digər xəbərləri
