Kanada “Titan” batiskafının axtarışına daha iki gəmi və sualtı aparat göndərib
Bakı, 22 iyun, AZƏRTAC
Kanadanın Sahil Mühafizə Xidmətinin daha iki gəmisi “OceanGate Expeditions” kompaniyasına məxsus “Titan” batiskafının axtarış zonasına yollanıb.
AZƏRTAC CTV telekanalına istinadla xəbər verir ki, Atlantik okeanında itən mini sualtı qayığın axtarıldığı rayona (20 min kvadratkilometr) Kanadanın özəl kompaniyalarından birinə məxsus daha bir sualtı aparat da çatdırılacaq. Beləliklə, əməliyyata Kanada Sahil Mühafizə Xidməti və Hərbi Dəniz Qüvvələrinin beş gəmisi, o cümlədən barokamera və tibbi personala malik gəmi cəlb olunacaq.
Bir müddət öncə Kanadanın “Horizon Arctic” gəmisinin məsafədən idarə olunan pilotsuz sualtı aparatı dəniz dibinə çataraq batiskafın axtarışına başlayıb. Sonradan Fransaya məxsus “Atalante” gəmisi də öz sualtı aparatı ilə axtarışlara qoşulub.
ABŞ Sahil Mühafizə Xidmətinin məlumatına görə, “Titan” batiskafında oksigen ehtiyatı bu gün mərkəzi Avropa vaxtı ilə saat 13:08-də bitməli idi. Lakin ekspertlərin fikrincə, bu təxmini ölçüdür və sərnişinlər oksigen ehtiyatlarının qənaəti ilə bağlı tədbir görmüş olsa, axtarış üçün daha çox vaxt qazanılmış olar.
Bölmənin digər xəbərləri
