Kanadanın Vaterloo Universiteti Azərbaycan İnformasiya Texnologiyaları Universiteti ilə əməkdaşlıq edəcəkdir
Bakı, 6 noyabr (AZƏRTAC). Rabitə və informasiya texnologiyaları naziri Əli Abbasov dünyanın aparıcı ali təhsil müəssisələrindən olan Kanadanın Vaterloo Universitetinin prezidenti Feridun Hamdullahpurla görüşmüşdür.
Nazirliyin mətbuat xidmətindən AZƏRTAC-a bildirmişlər ki, görüşdə nazir Ə. Abbasov informasiya-kommunikasiya texnologiyaları sahəsində görülən işlər, bu sahədə aparılan islahatlar və perspektivlər barədə məlumat vermiş, sektorun inkişaf tempinin ildən-ilə yüksəldiyini vurğulamışdır.
Nazir yeni yaradılmış İnformasiya Texnologiyaları Universitetinin fəaliyyətinin təşkilində Vaterloo Universitetinin təcrübəsinin nəzərdən keçiriləcəyini, həmçinin birgə fəaliyyət planının hazırlanacağını bildirmişdir.
F.Hamdullahpur ölkəmizdə İKT-nin Azərbaycanda prioritet elan edilməsini, o cümlədən İnformasiya Texnologiyaları Universitetinin yaradılmasını təqdirəlayiq hal kimi dəyərləndirmişdir.
Vaterloo Universitetində təhsil alan 30 azərbaycanlı tələbənin yüksək göstəricilər əldə etdiyini deyən qonaq təcrübə mübadiləsinin vacibliyini qeyd etmişdir.
Bölmənin digər xəbərləri
