Kasım-Jomart Tokayev: İtaliya ilə Qazaxıstan arasında ticarət dövriyyəsi 20 milyard dollara çatıb

30.05.2025 [17:53]
Çap et
A⁺ A^-

Astana, 30 may, AZƏRTAC

İtaliya Qazaxıstanın ticarət tərəfdaşları arasında üçüncü yeri tutur və ən iri investorlar sırasında yer alır.

AZƏRTAC Qazaxıstan Prezidentinin mətbuat xidmətinə istinadla xəbər verir ki, bu barədə Qazaxıstan Prezidenti Kasım-Jomart Tokayev İtaliyanın Baş naziri Ciorcia Meloni ilə iki ölkənin nümayəndə heyətlərinin iştirakı ilə geniş tərkibdə keçirilən danışıqlarda bildirib.

Onun sözlərinə görə, ötən ilin yekunlarına əsasən ölkələr arasında ticarət dövriyyəsi 24 faiz artaraq 20 milyard dollara çatıb.

“Son 20 ildə İtaliya Qazaxıstan iqtisadiyyatına 7,6 milyard dollara qədər investisiya yatırıb”, – deyə o qeyd edib.

Prezident vurğulayıb ki, Qazaxıstanda ENI, “SDF Group”, “PetroValves”, “Maire Tecnimont” və “Ballestra” kimi iri investorlar da daxil olmaqla, təxminən 270 İtaliya şirkəti uğurla fəaliyyət göstərir.

“Qazaxıstan və İtaliya qarşılıqlı hörmətə, etimada və ümumi maraqlara əsaslanan strateji tərəfdaşlardır”, – deyə o bildirib.

Elşən Rüstəmov

AZƏRTAC-ın xüsusi müxbiri

Astana