KƏND TƏSƏRRÜFATI MƏHSULLARININ İXRACINDA KARTOF ƏSAS YERLƏRDƏN BİRİNİ TUTUR
Bakı, 3yanvar (AZƏRTAC). 2015-ci ildə kartof istehsalının 1,12 milyon tona çatdırılması nəzərdə tutulur.
Bunu kənd təsərrüfatı naziri İsmət Abasov demişdir. Nazir bildirmişdir ki, “2008-2015-ci illərdə Azərbaycan Respublikasında əhalinin ərzaq məhsulları ilə etibarlı təminatına dair Dövlət Proqramı” çərçivəsində həyata keçirilən tədbirlər bir çox sahələrdə olduğu kimi, bitkiçilik məhsullarının istehsalının strukturunda da müəyyən dəyişikliklərə səbəb olmuşdur. Artıq əhalinin kartofa olan illik tələbatı daxili istehsal hesabına təmin olunur. Kənd təsərrüfatı məhsullarının ixracının strukturunda faraş kartof əsas yerlərdən birini tutur. Məhsul istehsalının artırılmasında toxumçuluğun inkişafının rolu əvəzedilməzdir. 2009-cu ildə Hollandiyanın “Azərbaycanda kartof toxumçuluğu bazasının yaradılması” layihəsi çərçivəsində “DV Agriconsult international” şirkəti tərəfindən Tovuz rayonunda 30 hektar sahədə bu ölkədən gətirilmiş kartof toxumları uğurla sınaqdan keçirilmişdir.
Məlumat üçün bildirək ki, 2008-cı ildə ölkəmizdə 337 min ton tələbata qarşı 1 milyon 077,1 min ton kartof istehsal edilmişdir ki, bu da əhalinin tələbatından 3,2 dəfə çoxdur. Məhsulun xeyli hissəsi ixrac olunmuşdur. 2009-cu ilin on bir ayı ərzində isə 979,1 min ton kartof istehsal olunmuşdur.
Bölmənin digər xəbərləri
