Kənd təsərrüfatı naziri İSMƏT ABASOV ilin birinci yarısında ölkə üzrə 864 milyon manatlıq kənd təsərrüfatı məhsulları istehsal olunduğunu diqqətə çatdırdı:

-Əsası ümummilli liderimiz Heydər Əliyev tərəfindən qoyulmuş aqrar islahatların bu gün onun layiqli davamçısı, möhtərəm Prezidentimiz İlham Əliyev tərəfindən uğurla həyata keçirilməsi ölkənin aqrar sahəsinin inkişafında həlledici rol oynayır. Son illərdə islahatların dərinləşməsi, ictimai-siyasi və makroiqtisadi sabitlik, iqtisadiyyatın və əhalinin həyat səviyyəsinin yüksəldilməsi və Azərbaycanın dünya iqtisadi sistemində layiqli yerini tutması xalqımız tərəfindən qürur və rəğbət hissi ilə qarşılanır.

2007-ci ilin birinci yarısında 864 milyon manat dəyərində kənd təsərrüfatı məhsulları istehsal edilmişdir ki, bu da ötən ilin müvafiq dövrünə nisbətən bütövlükdə kənd təsərrüfatı məhsullarının 4,8 faiz artımını təşkil edir.

Cari ilin iyul ayının 30-na olan məlumata görə, 670 min 661 hektar sahənin taxılı biçilmiş, 1 milyon 767 min 858 ton taxıl istehsal edilmişdir. Ötən illə müqayisədə hər hektarın məhsuldarlığı 0,7 sentner çox olmuşdur. Taxıl biçini hələ davam edir. Hava şəraitinin qeyri sabit keçməsinə baxmayaraq, ilin sonuna 1,9-2,0 milyon ton payızlıq və yazlıq dənli və dənli-paxlalıların istehsalı gözlənilir.

Ayın əvvəllərində əhali arasında taxıl qıtlığı barəsində heç bir əsası olmayan şayiə yayılmışdı. Bu məsələyə aydınlıq gətirmək məqsədi ilə mütəmadi olaraq kütləvi informasiya vasitələri ilə real vəziyyəti əhaliyə çatdırırıq. Statistik məlumata görə, cari ilin yanvar ayının birinə respublikada 656,4 min ton taxıl qalığı olmuşdur. Bu ilin 6 ayında respublikaya 590,7 min ton taxıl gətirilmişdir.

Cari ilin yanvarın birinə olan taxıl qalığını, ilin birinci yarısında idxalı və əhali tərəfindən yarımillik istehlakı nəzərə alsaq, iyul ayının 1-nə respublikada 482,1 min ton taxıl qalığı yaranmışdır. Hesablamalar göstərir ki, cari ilin ikinci yarısında taxıl idxalının həcmi nəzərə alınmamaqla, daxili istehsal hesabına 2008-ci ilin yanvarın birinə 638 min ton ərzaq buğdası qalığı yaranacaqdır. Qeyd etmək lazımdır ki, əlavə dəyər vergisinin götürülməsi ilə əlaqədar taxıl idxalının intensivləşdirilməsi gözlənilir. Bu da taxıl qıtlığının yaranması barədə söhbətə son qoyulmasına bir daha əsas verir.

Hörmətli cənab Prezident!

Respublika əhalisinin ərzaq məhsulları ilə təminatında daxili istehsalın rolu ilbəil yüksəlir, ixrac olunan məhsulların miqdarı və çeşidi artır. 2007-ci ilin 5 ayı ərzində keçən ilin müvafiq dövrünə nisbətən ixrac edilən kənd təsərrüfatı və emal sənayesi məhsullarının ümumi həcmi 43,7 faiz artmış və 142 milyon ABŞ dolları təşkil etmişdir. Əhalinin kartof, tərəvəz, bostan və meyvə məhsulları üzrə adambaşına istehlak tələbatı daxili istehsal hesabına ödənilir.

İyul ayının 1-nə olan məlumata görə, sahələrdən 226,8 min ton kartof, 263,7 min ton tərəvəz, 14 min ton bostan məhsulları, 60,1 min ton meyvə, 368,4 ton yaşıl çay yarpağı yığılmışdır. Bu məhsulların yığımı davam etdirilir.

Keçən ilin müvafiq dövrünə nisbətən qaramalın sayı 3,7 faiz artaraq 2 milyon 475 min başa, davarların sayı 3,9 faiz artaraq 8 milyon 130 min başa çatmışdır. Cari ilin birinci yarısında keçən ilin eyni dövrünə nisbətən diri çəkidə 14,6 min ton və ya 11,4 faiz çox ət, 12,9 min ton yaxud 2 faiz çox süd, 9,4 faiz çox yumurta, 600 ton və ya 5,1 faiz çox yun istehsal olunmuşdur.

Xüsusi vurğulamaq lazımdır ki, hörmətli Prezidentimiz cənab İlham Əliyev tərəfindən imzalanmış “Kənd təsərrüfatı məhsulları istehsalçılarına dövlət dəstəyi haqqında” 2007-ci il 23 yanvar tarixli Sərəncamla kənd təsərrüfatı məhsulları istehsalçılarının məhsul istehsalı üçün istifadə etdikləri yanacağın, motor yağlarının və mineral gübrələrin dəyərinin orta hesabla 50 faizinin dövlət tərəfindən ödənilməsini təmin etmək məqsədi ilə 2007-ci ilin dövlət büdcəsindən 80 milyon manat vəsaitin ayrılması və eyni zamanda, “Aqrar bölmədə lizinqin genişləndirilməsi sahəsində əlavə tədbirlər haqqında” Azərbaycan Respublikası Prezidentinin 2004-cü il 23 oktyabr tarixli 468 nömrəli Sərəncamına dəyişiklik edilərək, “Aqrolizinq” ASC tərəfindən respublikaya gətirilən texnikanın siyahısına texnoloji avadanlıqların da daxil edilməsi, mülkiyyət hüququnun istifadəçiyə keçməməsi şərti ilə texnikaların lizinqə verilməsi və ya dəyərinin ödənilmə müddətinin 5 ildən 10 ilə müəyyən edilməsi kəndli sahibkarlar tərəfindən böyük ruh yüksəkliyi və minnətdarlıqla qarşılanmışdır.

Hesab edirik ki, bu Sərəncam kəndli sahibkarlar tərəfindən böyük rəğbətlə qarşılanan, ölkəmizin aqrar siyasəti tarixində ən vacib sənədlərdən biridir. Cənab Prezident, bu diqqət və qayğıya görə, Sizə dərin minnətdarlığımızı bildiririk.

Yuxarıda adı çəkilən Sərəncamın icrası ilə əlaqədar Nazirlər Kabinetinin 2007-ci il 15 fevral tarixli qərarı ilə respublika Komissiyası yaradılmışdır. İyul ayından Komissiyanın mütəmadi olaraq iclasları keçirilmiş və rayon komissiyalarının təqdim etdikləri materiallar çox ciddi şəkildə müzakirə edilmişdir. Müzakirələr zamanı rayonlardan göndərilmiş sənədlərdən bu günə 25 rayonun sənədləri məqbul sayılmışdır. Hazırda sənədlərin araşdırılaraq baxılması davam etdirilir.

Hörmətli cənab Prezident!

Sizin fermer və sahibkarlar tərəfindən böyük rəğbətlə qarşılanan “Aqrar bölmədə lizinqin genişləndirilməsi sahəsində əlavə tədbirlər haqqında” Sərəncamınız öz bəhrəsini verir. 2005-ci ildən indiyədək “Aqrolizinq” Açıq Səhmdar Cəmiyyəti tərəfindən dövət vəsaiti hesabına 555 taxılyığan kombayn, 1324 traktor və ekskavator, 2920 ədəd müxtəlif kənd təsərrüfatı maşınları, 76 min 950 ton mineral gübrə alınmışdır. Bunlar Nazirlər Kabineti tərəfindən təsdiq edilmiş Qaydalara müvafiq olaraq satılır və ya lizinqə verilir. Hazırda yeni texnoloji avadanlıqların və axın xətlərinin alınması üçün müvafiq işlər görülür.

Cənab Prezident, Sizin göstərişiniz əsasında ölkənin 55 rayonunda “Aqrolizinq”in aqroservis xidməti filialları, 10 təchizat bazası yaradılmışdır və onlar öz fəaliyyətlərini davam etdirir.

Cənab Prezidentin göstərişinə əsasən, ötən ilin iyul ayından Bakı şəhəri əhalisinin meyvə-tərəvəz məhsulları ilə təmin edilməsi və bazarlarda kənd təsərrüfatı məhsullarının qiymətlərinin süni artırılmasının qarşısının alınması məqsədi ilə mütəmadi olaraq satış yarmarkaları təşkil edilmişdir. Bu günədək 110 dəfə keçirilmiş yarmarkalarda 18,7 min ton kənd təsərrüfatı, heyvandarlıq və emal sənayesi məhsulları satılmışdır.

Hörmətli cənab Prezident!

Əhalinin ərzaq məhsulları, xüsusən kənd təsərrüfatı məhsulları ilə təmin edilməsində hərtərəfli kömək və qayğınıza görə respublikanın aqrar sahəsində çalışan fermer və sahibkarlar adından Sizə dərin minnətdarlığımı bildirirəm. Sizi əmin etmək istəyirəm ki, bu diqqət və qayğıya cavab olaraq, üzərimizə düşən vəzifələri layiqincə yerinə yetirəcək və əhalimizi keyfiyyətli kənd təsərrüfatı məhsulları ilə təmin edəcəyik.