KƏND TƏSƏRRÜFATINDA ÜMUMİ MƏHSUL ARTIMI 3,6 FAİZ OLMUŞDUR
Bakı, 1 dekabr (AZƏRTAC). Aqrar bölmədə məhsul yığımı başa çatmaq üzrədir.
Dövlət Statistika Komitəsindən bildirmişlər ki, noyabrın 1-dək tarlalardan qarğıdalı ilə birlikdə 2 milyon 986,8 min ton taxıl, 970,3 min ton kartof, 1 milyon 152,4 min ton tərəvəz, 584,1 min ton meyvə və giləmeyvə, 409 min ton bostan məhsulları, 108,1 min ton üzüm, 2,5 min ton tütün, 119,1 min ton şəkər çuğunduru, 372,7 ton yaşıl çay yarpağı toplanmışdır. Noyabrın 2-dək 22,1 min ton pambıq toplanıb emal müəssisələrinə təhvil verilmişdir.
Kartof, tərəvəz və pambıq istehsalının azalmasına baxmayaraq, ümumilikdə bitkiçilik məhsulları istehsalı 4,2 faiz artmış, taxıl istehsalında rekord göstəriciyə nail olunmuşdur.
Bitkiçilik məhsulları ilə yanaşı heyvandarlıq məhsulları istehsalı da dinamik olaraq artır. İlin əvvəlindən bəri diri çəkidə 254,2 min ton ət, 1 milyon 190,4 min ton süd, 991,8 milyon ədəd yumurta və 14,8 min ton yun istehsal olunmuşdur. 2008-ci ilin müvafiq dövrünə nisbətən diri çəkidə ət istehsalı 0,6 faiz, süd istehsalı 2,6 faiz, yumurta istehsalı 10,2 faiz, yun istehsalı 4,9 faiz, bütövlükdə heyvandarlıq məhsulları istehsalı 2,4 faiz artmışdır.
Həm bitkiçilik, həm də heyvandırlıq sahəsində qazanılmış uğurlar kənd təsərrüfatında ümumi məhsulun 3,6 faiz artması ilə nəticələnmişdir.
Bölmənin digər xəbərləri
