Keniyada 5 min nadir diri qarışqanı ölkədən çıxaranlar saxlanılıb
Qahirə, 17 aprel, AZƏRTAC
Keniya polisi 5 minə qədər canlı qarışqanı ölkədən çıxarmağa cəhd edən iki belçikalı gənci saxlayıb. Onlar “vəhşi təbiət növlərinin qaçaqmalçılığı” ittihamı ilə Nayrobidə məhkəmə qarşısına çıxarılıblar.
AZƏRTAC “əl-Arabi” televiziya kanalına istinadla xəbər verir ki, Keniya tərəfi nadir növ sayılan “Messor cephalotes” qarışqalarının içi pambıqla dolu xüsusi kiçik kapsullarda Avropa və Asiya bazarlarında satılmaq məqsədilə aparıldığını iddia edir. Müttəhimlər isə ifadələrində bildiriblər ki, qarışqaları əylənmək məqsədilə toplayıblar və bunun qanunsuz olduğunu qabaqcadan bilməyiblər.
On doqquz yaşlı belçikalılara bu işdə daha iki şəxs kömək edib. Onlar da saxlanılıblar.
Diqqətə çatdırılır ki, Keniyada açıq sahələrdə yayılmış bu qarışqa növünün qiyməti bəzən 130 dollara çatır. Məhkəmə qərarında bildirilir ki, toplanmış qarışqaların ümumi qiyməti 7800 ABŞ dollarıdır.
Qeyd edək ki, Keniya vəhşi təbiətin nadir növlərinin qaçaqmalçılığı üçün cəzbedici ölkə sayılır. Belə ki, bu ölkədə dünyada biomüxtəlifliyin 25 faizi vardır. Bundan başqa, burada 7000 nadir bitki, 2000 nadir bakteriya və göbələk növü mövcuddur.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
