Kiçik və orta biznes Qarabağın inkişafına mühüm töhfələr verir
Bakı, 21 iyun, AZƏRTAC
İşğaldan azad edilmiş ərazilərin, o cümlədən Qarabağın yüksək texnologiyalar və innovasiyalar bölgəsinə çevrilməsi dövlətimizin iqtisadi inkişafına əhəmiyyətli töhfə verəcək. Bu baxımdan kiçik və orta sahibkarların da üzərinə böyük məsuliyyət düşür.
AZƏRTAC xəbər verir ki, Qarabağın azad edilməsi bu bölgədə kiçik və orta sahibkarlar üçün tarixi bir fürsət yaradır.
Vətən müharibəsində Müzəffər Ali Baş Komandan İlham Əliyevin rəhbərliyi ilə əldə edilən Qələbə və Qarabağ bölgəsinin işğaldan azad edilməsi ölkəmizdə biznesin inkişafı üçün əlavə mənbələr açmış oldu.
Məlumdur ki, Qarabağ ərazisi zəngin təbii və faydalı resurslara malikdir. Regionun turizm, kənd təsərrüfatı, aqrar-emal, xalq sənətkarlığı və s. kimi ənənəvi iqtisadi sektorlarının yenidən canlandırılması və xarici bazarlara çıxış böyük perspektivlər vəd edir. KOBİA tərəfindən həm Qarabağın iqtisadi potensialının beynəlxalq müstəvidə tanıdılması, həm də işğaldan azad edilmiş ərazilərdə biznes qurmaq istəyən sahibkarlıq subyektlərinin müraciətlərinin toplanması istiqamətində işlər bu gün də davam etdirilir.
Qeyd edək ki, Azərbaycan dövləti KOB-lara dəstək göstərməklə əlverişli innovasiya mühiti üçün dayanıqlı təməl yaratmağa çalışır. Təsadüfi deyil ki, ölkəmizdə fəaliyyət göstərən biznes subyektlərinin 99,6 faizini KOB subyektləri təşkil edir, bu da respublikada kiçik və orta biznesin inkişaf səviyyəsinin əyani göstəricisidir.
Xatırladaq ki, işğaldan əvvəlki dövrdə bu ərazilərdə 160-dan çox müxtəlif növ mineral yataqlar qeydə alınıb. Qarabağ həm də mineral su ehtiyatları ilə zəngindir. Məsələn, Şuşa şəhərinin yaxınlığında yerləşən mineral su bulaqları xüsusi əhəmiyyət kəsb edir. Bu suların tərkibi dəmir və müalicəvi elementlərlə zəngindir. Qarabağ füsunkar təbiəti ilə yanaşı, yeraltı və yerüstü sərvətlərə, zəngin iqtisadi potensiala, geniş turizm imkanlarına malikdir.
Hazırda isə Qarabağda texnoloji park və mərkəzlərin açılması planlaşdırılır. Həmin ərazidə, həmçinin bərpa olunan enerji mənbələrinin istifadəsini, enerji səmərəliliyini, ekoloji cəhətdən təmiz texnologiyaları, o cümlədən nəqliyyat vasitələrinin istifadəsini əhatə edəcək yaşıl zona konsepsiyasının inkişafına başlanılıb. İlkin hesablamalara görə, bu ərazilərdə 4000 meqavatdan çox günəş, 500 meqavatadək külək enerjisi ehtiyatları mövcuddur. Dünyanın ən qabaqcıl texnologiyaları alternativ enerjidən istifadənin stimullaşdırılmasına və ekoloji tarazlığın təmin edilməsinə yönəlib. Bunun üçün Laçın-Kəlbəcər bölgələrində külək enerjisindən, Zəngilan-Cəbrayıl bölgələrində isə günəş enerjisindən istifadə imkanları mövcuddur. “Yaşıl enerji” zonası kimi bərpa olunması nəzərdə tutulan Qarabağ ərazisi müasir yaşayış məskənlərindən biri olacaq.
Sahibkarlıq subyektləri tərəfindən işğaldan azad edilən ərazilərdə xidmət, logistika, istehsal sahələri üzrə fəaliyyət göstərməklə bağlı Sahibkarlığın İnkişafı Fonduna müraciətlər daxil olmaqda davam edir. Fond həm dövlət zəmanətli kredit, həm güzəştli kredit istiqamətində sahibkarlıq subyektlərinə dəstək göstərir. Bir sözlə, bu faktorlar Azərbaycanda azad sahibkarlığın və liberal iqtisadiyyatın inkişafının diqqət mərkəzində olduğunu bir daha təsdiqləyir.
Bölmənin digər xəbərləri
