KİYEVDƏ AZƏRBAYCAN VƏ UKRAYNA ALİ AVİASİYA MƏKTƏBLƏRİ ARASINDA ƏMƏKDAŞLIQ HAQQINDA SAZİŞ İMZALANMIŞDIR
AZƏRTAC-ın xüsusi müxbiri xəbər verir ki, sentyabrın 24-də Kiyevdə Azərbaycan Milli Aviasiya Akademiyası (MAA) və Ukrayna Milli Aviasiya Universiteti (MAU) arasında əməkdaşlıq haqqında saziş imzalanmışdır.
Təntənəli imzalanma mərasimində MAA-nın prorektoru, texnika elmləri doktoru Orxan Əfəndiyev Akademiyanın rektoru Arif Paşayev tərəfindən Bakıda imzalanmış sazişi Ukrayna tərəfinə təqdim etmişdir. MAU-nun rektoru, professor Nikolay Kulik də həmin sənədi imzalamışdır. O.Əfəndiyev MAA-nın bütün kollektivi adından Nikolay Kuliki MAU-nun 75 illiyi münasibətilə təbrik edərək, Azərbaycan Prezidenti İlham Əliyevin və “Azərbaycan Hava Yolları” Qapalı Səhmdar Cəmiyyəti rəhbərliyinin MAA-ya, onun müasir texnika və avadanlıqla təchiz edilməsinə böyük diqqət və qayğı ilə yanaşmalarından söhbət açmış, yeni sazişin iki ölkənin ali aviasiya məktəbləri arasında gözəl perspektivlər açacağını bildirmişdir.
MAU haqqında məlumat verən N.Kulik isə bildirmişdir ki, 75 il ərzində bu ali təhsil ocağında dünyanın 140 ölkəsinin, o cümlədən Azərbaycanın nümayəndələri təhsil almışlar. Hazırda MAU-da təkcə Fransadan 50 tələbə, habelə MDB və Avropa ölkələrinin, ABŞ-ın və dünyanın digər ölkələrindən gəlmiş tələbələr təhsil alırlar. N.Kulik vurğulamışdır ki, Azərbaycan dövlətinin Milli Aviasiya Akademiyasına göstərdiyi diqqət və qayğını yüksək qiymətləndirir, çünki Ukraynadakı qeyri-sabit vəziyyət MAU-ya diqqət yetirməyə imkan vermir.
İmzalanma mərasimində Azərbaycanın Ukraynadakı səfiri Tələt Əliyev iştirak edirdi.
Bölmənin digər xəbərləri
