“Konstitusiya və Suverenlik İli” çərçivəsində Balakəndə ədəbi-bədii kompozisiya təqdim edilib
Balakən, 19 dekabr, Mustafa Dadaşov, AZƏRTAC
“Konstitusiya və Suverenlik İli” çərçivəsində dekabrın 19-da Balakən rayon Mədəniyyət Mərkəzində “Heydər Əliyev Konstitusiyamızın və dövlət suverenliyimizin banisidir” adlı ədəbi-bədii kompozisiya təqdim olunub. Tədbirdə Balakən Rayon İcra Hakimiyyətinin, müəssisə və təşkilatların rəhbər şəxsləri və əməkdaşları, ziyalılar, gənclər iştirak ediblər.
Bu barədə AZƏRTAC-ın bölgə müxbirinə Şəki-Zaqatala Regional Mədəniyyət İdarəsindən məlumat verilib.
Bildirilib ki, tədbir Dövlət Himninin səsləndirilməsi ilə başlayıb, Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib.
Çıxış edənlər Ümummilli Lider Heydər Əliyevin müasir Azərbaycan dövlətçiliyinin formalaşmasında, Azərbaycan Respublikası Konstitusiyanın qəbulunda və dövlət suverenliyinin möhkəmləndirilməsində oynadığı əvəzsiz roldan bəhs ediblər.
Sonra Mədəniyyət Mərkəzinin əməkdaşlarının və bədii qiraət dərnəyi üzvlərinin iştirakı ilə Xalq şairi Zəlimxan Yaqubun “Əbədiyyət dastanı” poeması əsasında hazırlanmış ədəbi-bədii kompozisiya nümayiş etdirilib. Kompozisiyada Ulu Öndərin mənalı həyat yolu, dövlətçilik tariximizdəki misilsiz xidmətləri və xalqın yaddaşında əbədi yaşayan zəngin irsi bədii formada tamaşaçılara təqdim olunub.
Tədbir çərçivəsində Şəfəq Hacıyevanın fortepianoda müşayiəti ilə gənc vokalçı Vasif Qasımovun ifasında səsləndirilən Sevil Əliyevanın “Əziz anam” mahnısı tamaşaçılar tərəfindən maraqla qarşılanıb.
Sonda tədbir iştirakçıları Ulu Öndər Heydər Əliyevin həyat və fəaliyyətinə həsr edilmiş kitab sərgisi ilə tanış olublar.
Bölmənin digər xəbərləri
