“Konstitusiya və Suverenlik İli” çərçivəsində gənclər üçün silsilə tədbirlər keçirilib
Bakı, 22 aprel, AZƏRTAC
Ulu Öndər Heydər Əliyev tərəfindən əsası qoyulan və Prezident İlham Əliyevin uğurla davam etdirdiyi dövlət gənclər siyasəti gənclərimizin hərtərəfli inkişafına mühüm töhfə verir. Bu siyasət çərçivəsində vətənpərvərlik hisslərinin gücləndirilməsi, gənclərin şəxsi inkişafı və karyera quruculuğuna dəstək məqsədilə Gənclərin İnkişaf və Karyera Mərkəzinin (GİKM) təşkilatçılığı ilə Bakı və regionlarda silsilə tədbirlər həyata keçirilib.
Bu barədə AZƏRTAC-a açıqlamasında GİKM-in İctimaiyyətlə əlaqələr və kommunikasiya şöbəsinin müdiri Könül Abdulrəşidova Mərkəzin 2025-ci ilin yanvar-mart aylarını əhatə edən ilk rübü üzrə fəaliyyəti haqqında məlumat verərkən bildirib.
Qeyd edilib ki, ölkə üzrə 11 regional nümayəndəlik və 44 bölmədən ibarət olan Mərkəz tərəfindən 8 minə yaxın gənc 200-dən çox müxtəlif formatlı proqram, təlim və tədbirlərə cəlb olunub. Prezident tərəfindən 2025-ci ilin “Konstitusiya və Suverenlik İli” elan edilməsi ilə bağlı tədbirlər planına uyğun olaraq hüquqi maarifləndirmə və vətəndaşlıq dəyərlərinin təbliği istiqamətində 30-dan çox maarifləndirici görüş, seminar və intellektual yarış təşkil edilib. Bu tədbirlər nəticəsində gənclər Azərbaycan Konstitusiyası, hüquqi dövlətin əsas prinsipləri və vətəndaş məsuliyyəti mövzularında əhatəli və praktiki biliklər əldə ediblər.
Vurğulanıb ki, vətənpərvərlik ruhunda yetişən, milli dəyərlərə bağlı gənclər yetişdirmək GİKM-in əsas prioritetlərindəndir. Bu istiqamətdə həyata keçirilən layihələr gənclərdə dövlətçilik düşüncəsinin formalaşmasına xidmət edir. Gənclər tərəfindən maraqla qarşılanan bu tədbirlər çərçivəsində yüzlərlə layihə uğurla icra olunub.
Rüb ərzində 100-dən artıq gəncə “Karyera kompası” layihəsi çərçivəsində fərdi karyera məsləhətləri təqdim olunub. Gənclərə peşə seçimi, CV və motivasiya məktubu hazırlanması, iş müraciəti ilə bağlı konsultasiyalar verilib. Xüsusilə regionlarda yaşayan gənclər üçün “GPS – Gənclərin Peşə Seçimi” adlı maarifləndirici sessiyalar təşkil olunub.
Gənclərin təhsil aldıqları ixtisaslar barədə məlumatlılığını artırmaq, onların karyera planlamasına dəstək vermək və şəbəkələşməni təşviq etmək məqsədilə “CareerLAB” şəbəkəsi bu il də fəaliyyətini davam etdirib. Üç ay ərzində Bakı və regionlardakı ali təhsil müəssisələrində keçirilən layihələrə 500-dən çox gənc qoşulub.
“Peşəkarla dialoq” layihəsi çərçivəsində müxtəlif sahələrdə çalışan tanınmış şəxslərlə interaktiv görüşlər təşkil olunub. Bu görüşlər gənclərə real iş təcrübəsi, əmək bazarının tələbləri və şəxsi inkişaf yolları barədə birbaşa məlumat əldə etmək imkanı verib.
Eyni zamanda, “İnkişaf və Təcrübə Akademiyası” 2025-ci ilin ilk rübündə fəal şəkildə fəaliyyət göstərib. Bakı üzrə 50-yə yaxın, regionlarda isə 100-dən çox gənc real iş mühitində təcrübə keçərək bacarıqlarını inkişaf etdirmək imkanı qazanıb. Artıq beşinci dəfədir təşkil olunan “Hazır mühasib” adlı ödənişsiz tədris proqramında 100 gənc mühasibatlıq sahəsində praktiki biliklər və bacarıqlar əldə edərək gələcək karyeralarına sağlam təməl qoyurlar.
Gənclərin Karyera İnkişaf Platforması da karyera quruculuğu sahəsində əsas fəaliyyətlərdən biridir. Bu platforma çərçivəsində 6 sessiya keçirilib, 100-dən çox gənc iştirak edib. “Karyera üçün addım at”, “Qadınlar üçün karyera inkişafı və rəqəmsal bacarıqlar” və “Karyerada biz” forumları çərçivəsində ümumilikdə 400-dən çox gənc əhatə olunub. Forumlarda peşəkar spikerlərin iştirakı ilə keçirilən panel müzakirələri iştirakçılara praktiki tövsiyələr və dəyərli məlumatlar təqdim edib.
GİKM tərəfindən həyata keçirilən bütün tədbirlər gənclərin nəzəri biliklərlə yanaşı, real təcrübə və motivasiya qazanmalarına şərait yaradıb. Şəxsi inkişaf GİKM-in fəaliyyətinin əsas prioritetlərindəndir. Bu istiqamətdə keçirilən “YouthStart” proqramı çərçivəsində ünsiyyət, təqdimat bacarıqları, vaxtın idarə olunması və komanda işi üzrə təlimlər təşkil olunub. 300-dən çox iştirakçının qatıldığı bu sessiyalar gənclərin özünəinamının və sosial bacarıqlarının inkişafına töhfə verib.
“Rəqəmsal gənclik” layihəsi isə gənclərin müasir texnologiyalarla tanışlığına və rəqəmsal bacarıqlarının artırılmasına yönəlib. GİKM-in təşkil etdiyi təlimlər gənclərin əmək bazarına uyğun biliklər qazanmasına şərait yaradıb.
Mərkəz çərçivəsində könüllü fəaliyyət də geniş vüsət alıb. Gənclər müxtəlif layihə və tədbirlərdə könüllü kimi iştirak edərək həm təcrübə qazanır, həm də faydalı işlərə töhfə vermək imkanı əldə edirlər. GİKM müxtəlif qurum və təşkilatlarla əməkdaşlıq edərək gənclər üçün daha geniş imkanlar yaratmağa davam edir.
Gənclərin İnkişaf və Karyera Mərkəzinin əsas məqsədi xüsusilə regionlarda yaşayan gənclərin vətənpərvərlik ruhunda yetişməsi, onların sosiallaşması, könüllülük fəaliyyətlərində aktiv iştirakı, şəxsi inkişafı və karyera quruculuğuna dəstək göstərilməsidir. GİKM bu istiqamətlər üzrə fəaliyyətlərini ilin növbəti aylarında da davam etdirməyi planlaşdırır.
Bölmənin digər xəbərləri
