Könül Hüseynova: Biz düşünürük ki, keçə sənətini Qarabağa qaytarmaq vacibdir
Kəlbəcər, 25 noyabr, Abdulla Suvar, AZƏRTAC
Bu gün Kəlbəcər Şəhəri Günü çərçivəsində keçirilən tədbirdə qədim xalq sənəti olan keçəçiliklə bağlı hazırladığımız məhsulları təqdim edirik. Keçə sənəti orta əsrlərdən etibarən Qarabağ ərazisində mövcud olub və inkişaf edib. Əsgərlər bu materialdan geyim kimi istifadə edir, həmçinin keçə daha çox məişət əşyalarının hazırlanmasında tətbiq olunurdu. XX əsrdə bu sənətdə müəyyən tənəzzül yaşansa da, son illər yenidən dirçəlmə mərhələsi başlayıb. Biz düşünürük ki, keçə sənətini Qarabağa qaytarmaq vacibdir.
Bunu AZƏRTAC-a açıqlamasında sənətşünas, rəssam Könül Hüseynova deyib. Onun sözlərinə görə, qədim dövrlərdə Qarabağın dağlıq ərazilərində keçə məmulatları geniş hazırlanır və əsasən çobanlıqda istifadə olunurdu.
“Biz bu sənəti müasirləşdirərək günümüzün tələblərinə uyğun, insanların istifadə edə biləcəyi əşyalara çevirməyi qarşıya məqsəd qoymuşuq. Bu mərkəzi Pirşağıda yaratdıq. Mərkəzin rəhbəri sənətşünaslıq üzrə fəlsəfə doktoru Əsmər Abdullayevadır. Əsmər xanım layihəni təqdim edərkən onun sosial layihə xarakteri daşıdığını vurğuladı və biz Pirşağıda yaşayan evdar xanımları bu sənətə cəlb edib öyrətdik. Artıq mərkəzimiz dörd ildir fəaliyyət göstərir. Bu müddət ərzində həm ölkə daxilində, həm də xaricdə, eləcə də yerli icmalar arasında keçə sənətinin yayılması istiqamətində fəaliyyət göstəririk”, – deyə o bildirib.
Bölmənin digər xəbərləri
