Kral III Çarlza tacqoyma mərasimi münasibətilə “Rolls-Royce” və nadir hədiyyələr təqdim olunub
London, 31 may, AZƏRTAC
Kral III Çarlzın tacqoyma mərasimi münasibətilə aldığı hədiyyələr rəsmi siyahı ilə açıqlanıb.
AZƏRTAC xəbər verir ki, siyahıya 300 min funt sterlinq dəyərində “Rolls-Royce” avtomobili, lələkdən hazırlanmış tac və əl işi olan kokos yarpağından papaqlar da daxildir.
Lüks “Rolls-Royce Cullinan Series II” avtomobili Bəhreyn Kralı Həməd bin İsa Al Xəlifə tərəfindən hədiyyə olunub. Rəsmi mənbələr bildirir ki, bu avtomobil dövlət başçısına verilmiş rəsmi hədiyyə sayıldığından yalnız rəsmi tədbirlərdə istifadə olunacaq və şəxsi mülkiyyətə çevrilməyəcək. Bəhreyn Kralı, həmçinin Kral Çarlza bəzəkli saat da hədiyyə edib.
Amazon yerlilərinin liderləri tərəfindən təqdim olunan lələk tac və Marşall Adaları prezidentindən gələn kokos yarpaqlarından toxunmuş iki papaq da qeyri-adi hədiyyələr sırasındadır. Həmçinin müxtəlif ölkələrdən gələn ağac hədiyyələri arasında İsveç kral ailəsinin göndərdiyi fidanlar və Avstriya prezidentindən Tirolean şamı yer alıb.
Digər hədiyyələr arasında Küveyt əmiri tərəfindən göndərilmiş masa və gəmi modeli, Bruney sultanından bəzəkli gil qab, ABŞ-ın sabiq prezidenti Co Baydendən isə Kraliça II Elizabet ilə Prezident Duayt Eyzenhauer arasında yazışmaların çap olunmuş nüsxələrini və görüş zamanı çəkilmiş fotonu ehtiva edən dəri qovluq yer alıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
