Kreml Ukraynanın NATO-ya üzvlüyünün istisna edilməsinə dair ABŞ-ın mövqeyindən məmnundur
Bakı, 21 aprel, AZƏRTAC
Bazar ertəsi, aprelin 21-də Kreml ABŞ administrasiyasının Ukraynanın NATO-ya üzvlüyünü istisna edən mövqeyindən məmnun olduğunu bildirib.
AZƏRTAC Rusiya mediasına istinadla xəbər verir ki, Rusiya Prezidentinin mətbuat katibi Dmitri Peskov bununla bağlı jurnalistlərə müsahibəsində deyib: “Biz Vaşinqtondan müxtəlif səviyyələrdə eşitmişik ki, Ukraynanın NATO-ya üzvlüyündən söhbət gedə bilməz. Bu, bizi qane edən və mövqeyimizlə üst-üstə düşən bir məsələdir”.
“Kiyevin hərbi alyansa inteqrasiya perspektivi olmamalıdır”, -deyən Peskov Ukraynanın NATO-ya üzvlüyünün Rusiyanın milli maraqlarına təhdid olacağını əlavə edib. O vurğulayıb ki, məhz bu məsələ Ukraynada münaqişənin əsas səbəblərindən biridir.
Peskov, həmçinin ABŞ Prezidenti Donald Trampın Rusiya və Ukraynanın bu həftə razılığa gələ biləcəyinə ümid etdiyini ifadə edən bəyanatını da şərh edib. O deyib ki, Moskva davam edən müharibənin nizamlanmasına açıqdır. Bununla belə, mətbuat katibi mümkün həll üçün vaxt verməkdən imtina edib.
Donald Tramp bazar günü bildirib ki, o, hər iki ölkənin bu həftə münaqişəni sona çatdırmaq üçün şənbə günü saat 18:00-da başlayan 30 saatlıq Pasxa atəşkəsi kimi razılığa gələcəyinə ümid edir.
Bu arada, həm Rusiya, həm də Ukrayna bir-birini atəşkəs rejiminin qüvvədə olduğu müddətdə onu pozmaqda ittiham edib.
Bölmənin digər xəbərləri
