Kriptosferada investisiyalar rekord həddə çatıb
Bakı, 26 fevral, AZƏRTAC
Kriptovalyuta və blokçeynlə əlaqəli şirkətlərin investisiyalar bazarında aparılan yeni araşdırmalar 2017-ci ildən bəri bu sahənin ümumi dollar məbləğinin 90 milyard dollara yüksəlməsi ilə daha bir rekorda çatdığını göstərib.
AZƏRTAC dünya mediasına istinadla xəbər verir ki, bu sahədə 2017-ci ildən indiyədək 9,5 mindən çox sövdələşmə həyata keçirilib.
“The Block Research”in məlumatına görə, təkcə 2024-cü ilin fevral ayında 50-dən çox, ilin əvvəlindən isə ümumilikdə 230 sövdələşmə başa çatıb ki, bu da təxminən 1,3 milyard dollar təşkil edib. İnvestisiyaların böyük əksəriyyəti “DeFi”, NFT, oyun və web3 layihələrinə qoyulub. Əməliyyatların ən fəal iştirakçıları “Animoca Brands”, “Polychain Capital”, “Framework Ventures” və “Shima Capital” olub.
Bu ayın ən yüksək məbləğli sərmayələrindən birində “Tether” kompaniyası kriptomobil ödənişlər şirkəti “Oobit”ə 25 milyon dollarlıq A seriyası investisiyası üçün “Solana”nın həmtəsisçisi Anatoli Yakovenko ilə əməkdaşlıq edib.
Tədqiqatçılar, həmçinin qeyd ediblər ki, maliyyələşdirmə elanlarının əksəriyyəti (yuxarıda qeyd olunan “Oobit” müqaviləsindən başqa) 10 milyon dollardan az investisiyalar üçün olub.
Beləliklə, yeni aylıq sövdələşmələrin sayı nisbətən sabit olaraq qalır, lakin onların məbləğləri azalır və 2021-2022-ci illərin investisiya səviyyələrindən əhəmiyyətli dərəcədə aşağıdır.
Kriptovalyuta - əməliyyatların yoxlanılması zamanı bankların cəlb edilmədiyi rəqəmsal ödəniş sistemidir. Bu, hər kəsə və istənilən yerə ödənişlər göndərməyə, onları qəbul etməyə imkan verən “peer-to-peer” sxemindən ibarətdir. Blokçeyn ən son texnologiyadır və kriptovalyutaların populyarlığı ilə birlikdə ona da maraq artıb. Hərfi tərcümədə blokçeyn davamlı bloklar zənciridir və bütün əməliyyat qeydlərini ehtiva edir. Adi məlumat bazalarından fərqli olaraq, bu qeydlər dəyişdirilə və ya silinə bilməz, onlara yalnız yeniləri əlavə edilə bilər.
Bölmənin digər xəbərləri
