KÜR ÇAYININ RAYONLARA VURDUĞU ZİYANIN ARADAN QALDIRILMASI İSTİQAMƏTİNDƏ TƏDBİRLƏR DAVAM ETDİRİLİR
Saatlı, 19 iyul (AZƏRTAC). Kür çayının rayonlara vurduğu ziyanıın aradan qaldırılması istiqamətində tədbirlər davam etdirilir.
AZƏRTAC xəbər verir ki, Saatlı rayonunun Yeni Novruzlu kəndində 178 ailənin hər biri üçün fərdi ev tikintisinə başlanılır. Hacıqabul rayonunun Meyniman kəndində 22 evin tikintisi isə artıq yekunlaşmaq üzrədir.
Kür və Araz çaylarının daşması nəticəsində Saatlı rayonunun Yeni Novruzlu, Dəlilər, Nərimankənd və Musalı kəndlərində, habelə məcburi köçkünlərin məskunlaşdıqları Nərimankənd qəsəbəsində uçan evlərin, eləcə də mühafizə bəndlərinə yaxın kəndlərin sakinləri üçün yeni evlərin tikintisinə artıq başlanılmışdır. Bunun üçün Yeni Novruzlu kəndində 36,6 hektar sahə ayrılmışdır. Hələlik evlərin bünövrələri qazılır. Sel zamanı əsasən çiy kərpicdən tikilmiş evlər uçduğundan dövlət vəsaiti ilə evlər daşdan tikiləcəkdir. 1, 2, 3 və 4 otaqlı evlərin hər biri üçün 12 sot həyətyanı sahə də ayrılacaqdır.
Hacıqabul rayonunun Meyniman kəndində daşqınlar zamanı dağılan 22 evin əvəzinə də yeniləri tikilir. Evlərdə hörgü işləri artıq başa çatmışdır. Hazırda dam örtüyü vurulur. Təxminən bir aya sakinlər yeni evlərinə köçə biləcəklər.
Bölmənin digər xəbərləri
