Kür və Araz çaylarında biogen maddələrin səviyyəsi normadan artıqdır
Bakı, 29 fevral (AZƏRTAC). Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamenti Kür və Araz çaylarının çirklənmə səviyyəsini öyrənmək məqsədi ilə keçirdiyi növbəti monitorinqin nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, fevral ayının III ongünlüyündə Kür çayında su sərfi fevral ayının II ongünlüyünə nisbətən saniyədə 3 kubmetr artaraq saniyədə 120 kubmetr təşkil etmişdir. Gürcüstan və Ermənistan ərazilərindən təmizlənmədən axıdılan məişət tullantıları və sənaye müəssisələrinin çirkab sularının təsiri nəticəsində çayda biogen maddələrin miqdarı normadan dəfələrlə artıq olmuşdur.
Suyun tərkibindəki spesifik çirkləndiricilərdən fenol və mis birləşmələri Ağstafaçay su anbarında da yol verilən qatılıq həddini keçmişdir.
Eyni zamanda, Araz çayının Horadiz, Birinci Şahsevən və Bəhrəmtəpə məntəqələrində zərərli maddələrin normanı keçməsi məlum olmuşdur.
Suyun oksigen rejimi isə bütün məntəqələrdə sanitar norma daxilində dəyişmişdir.
Bölmənin digər xəbərləri
