İQTİSADİYYAT
Kurık dəniz limanı yükaşırmanı 15 faiz artırıb
Bakı, 15 sentyabr, AZƏRTAC
Qazaxıstanın Kurık dəniz limanı vasitəsilə 2023-cü ilin 8 ayı ərzində təxminən 1,5 milyon ton yük aşırılıb ki, bu da ötən ilin analoji dövrü ilə müqayisədə 15 faiz çoxdur.
AZƏRTAC “Qazaxıstan temir jolı” (QTJ) milli dəmir yolu şirkətinin mətbuat xidmətinə istinadla xəbər verir ki, yüklərin bir milyon tondan çoxu dəmir yolu nəqliyyatı, 430 min tondan çoxu – avtomobil nəqliyyatı ilə aşırılıb. Liman üzərindən 480 bərə, 14 minə yaxın vaqon və 18 mindən artıq yük avtomobil nəqliyyatı vasitəsi daşınıb.
Kurık limanı vasitəsilə Qazaxıstan neft və neft məhsulları, metal, gübrələr, kimya məhsullarının nəqli həyata keçirilir. Çin və Mərkəzi Asiya ölkələrindən Azərbaycan, Gürcüstan, Türkiyə, sonra Şərqi Avropaya və əks istiqamətə yüklərin tranziti artır.
Hazırda limanda taxıl terminalının tikintisi aparılır, onun üzərindən ildə milyon tona qədər taxıl daşınacaq.