Laçın səmasından dörd tərəfə sülh, birlik və inkişaf sədası yayılacaq – Məqalə
Quba, 30 may, AZƏRTAC
“Bölgələrdən AZƏRTAC üçün yazırlar”: ADPU-nun Quba filialının şöbə müdiri, Şərqşünas-alim Seyid Cabbarovun Laçında Azərbaycan, Türkiyə və Pakistan liderlərinin Zirvə görüşündən bəhs edən məqaləsini təqdim edirik.
Laçın… Bu ad bir zamanlar hüznlə xatırlanırdı - yurd həsrəti, işğal acısı, viran qoyulmuş ocaqlar… Amma 2 gün öncə, Müstəqillik Günündə təbiətin gözəl yaz fəslində Laçın yeni doğulmuş bir Günəş kimi dünyanın diqqət mərkəzinə düşdü. Azərbaycan tarixinin ən mötəbər günlərindən olan mayın 28-i yeni təntənəyə şahidlik etməklə yaddaşlara həkk olundu. Qartallar oylağı Laçın Azərbaycan-Türkiyə-Pakistan Zirvə görüşünə ev sahibliyi etdi.
Zirvə görüşü beynəlxalq əlaqələr baxımından nə qədər mühüm hadisədirsə, bir o qədər də böyük rəmzi məna daşıyır. Heç şübhəsiz ki, Vətən müharibəsindən sonra azad olunan Laçın şəhərinin üç ölkə liderinin Zirvə görüşünə ev sahibliyi etməsi regionda həm də təhlükəsizliyin və istiqrarın hökm sürdüyünün bariz nümunəsidir. Digər tərəfdən isə ölkəmiz yüksəksəviyyəli bu görüşlə dünya ictimaiyyətinə mesaj verir ki, işğaldan azad olunmuş ərazilər artıq sabitliyin, tərəqqinin, inkişafın, ən önəmlisi isə beynəlxalq əməkdaşlığın mərkəzinə çevrilib. Qardaş Türkiyə və Pakistan Cənubi Qafqazda yeni əməkdaşlıq imkanlarının açılmasında iştiraklarını ortaya qoymaqla mövqelərini bir daha nümayiş etdirdilər.
Laçın Beynəlxalq Hava Limanının təməli 3 il əvvəl Prezidentimizin iştirakı ilə qoyulmuşdur. Gün gəldi Qarabağın ürəyində, zirvələri göylərə dəyən Laçın dağlarının qoynunda yeni hava limanı açıldı. Bu, sadəcə, bir liman deyil, həm də milli qürurun, siyasi iradənin, qardaşlıq bağlarının simvolu oldu.
Üç qardaş ölkənin rəhbərləri Laçından dünyaya önəmli mesajlar verdilər. Qardaş Türkiyə Cümhuriyyətinin Prezidenti Rəcəb Tayyib Ərdoğan bildirdi ki, Laçın Beynəlxalq Hava Limanı regionun inkişafına və dünyaya inteqrasiyasına mühüm töhfə verəcək. Azərbaycan torpaqlarının 30 illik işğaldan azad edilməsi ilə regionun inkişaf və tərəqqi mərkəzinə çevrilməsinin vaxtı çatıb.
Pakistanın Baş naziri Məhəmməd Şahbaz Şərif bildirdi ki, gözəl Laçında Azərbaycan, Türkiyə və Pakistan bayraqlarının dalğalanmasını görmək qəlblərimizi hədsiz sevinc və fəxarət hissi ilə doldurur. Pakistan, Türkiyə və Azərbaycan - bu gün üç ruh, bir qəlbdir.
Prezident İlham Əliyevin “Əminəm ki, azad edilmiş Laçından bu gün üç ölkənin dünyaya verdiyi mesajlar lazımi ünvana çatacaq” – sözləri isə həm də ölkələrimizin sıx birliyinin göstəricisi idi.
Beləliklə, hər üç ölkənin liderləri bildirdilər ki, bu torpaqlar sülhə, inkişafa və qardaşlığa aiddir!
Laçında beynəlxalq hava limanının açılışı həm də dünyaya bir mesajdır: Qarabağ dirçəlir, Laçın ayaqdadır, Azərbaycan qalib dövlətdir və bu möhtəşəm Qələbəni paylaşmaq üçün yanında qardaş Türkiyə və Pakistan var. Qardaş ölkələr bir daha sübut etdilər ki, həmrəylik kağız üzərində deyil, bir yerdə olmaqla qurulmalıdır. Və üç ölkənin liderləri bu torpaqda bir araya gələrək tarix yazdılar! Artıq Laçın səmasından dörd tərəfə top-tüfəng səsi yox, sülh, birlik və inkişaf sədası yayılacaq.
Bölmənin digər xəbərləri
