Lerikdə qaz təsərrüfatına dair ünvanlanan suallar cavablandırılıb
Bakı, 25 may, AZƏRTAC
Vətəndaşların yerlərdə problemlərinin dinlənilməsinə və onların icrasına xidmət edən “Açıq mikrofon” aksiyası bu dəfə Lerik rayonunda baş tutub.
“Azəriqaz” İstehsalat Birliyindən AZƏRTAC-a bildirilib ki, aksiyaya rayonun müxtəlif kəndlərindən üz tutan sakinlər qarşılaşdıqları çətinliklərdən söz açıblar. Əsasən kənd yaşayış məntəqələrinin qazlaşdırılması ilə bağlı müraciətlər rayonun Pirasora, Şinqəbula, Gürdəsər, Günəşli, Mololan, Lərmərud və digər kəndlərin sakinləri tərəfindən ünvanlanıb. Lerik şəhəri Həzi Aslanov küçəsində yaşayan Firudin Səfərov yaşadıqları küçənin qazlaşdırıldığını, lakin sonradan inşa edilən 5 fərdi yaşayış evində mavi yanacaqdan istifadənin qeyri-mümkün olduğunu bildirərək, həmin hissədə də küçə qaz xəttinin çəkilməsini xahiş edib. Rayonun Məhləabad kənd sakini Asif Hüseynov və Kəlbəz kənd sakini Habil Quluzadə yaşadıqları ünvanın qarşısından keçən qaz xəttinin onlara mane olduğunu qeyd edərək, qaz xəttinin yerinin dəyişdirilməsini istəyiblər. Birliyin rəhbər şəxsləri daxil olan hər bir müraciətlə bağlı ətraflı izahatlar veriblər. Sakinlərə ünvanlanan hər müraciətin araşdırılması, lazımi tədbirlərin görüləcəyi ilə bağlı məlumat verilib.
Bölmənin digər xəbərləri
