Liderlərimizin şəxsi dostluq münasibətləri türkdilli dövlətlərin birləşməsinə böyük təkan verir
Bakı, 13 iyun, AZƏRTAC
Azərbaycan və türk xalqlarının dostluğu, qardaşlığı tarixin sınaqlarından keçərək bu gün ən yüksək səviyyəyə çatıb. Çanaqqala savaşında yüzlərlə azərbaycanlı türk qardaşları ilə çiyin-çiyinə vuruşaraq şəhid olublar. Türk zabit və əsgərləri 1918-ci ildə Bakının və digər ərazilərimizin erməni işğalından azad edilməsində böyük qəhrəmanlıq göstərib şəhid olublar. Bütün bunlar Azərbaycan və Türkiyə arasında tarixi qardaşlıq əlaqələrinin göstəricisidir. Bir millət, iki dövlət istər daxili məsələlərdə, istərsə də beynəlxalq arenada hər zaman həmrəylik nümayiş etdiriblər. Azərbaycan və Türkiyə liderləri İlham Əliyev və Rəcəb Tayyib Ərdoğanın dostluq və qardaşlıq münasibətləri kontekstində ölkələrimiz arasında əlaqələr daha da güclənib. İki lider arasında səmimi dostluq dövlətlərarası münasibətlərin dərinləşməsinə və özünün ən pik səviyyəsinə çatmasına imkan verib.
Bu fikirləri AZƏRTAC-a açıqlamasında Milli Məclisin deputatı professor Kamilə Əliyeva deyib.
Deputat Azərbaycan və türk xalqlarının tarix boyu hər zaman bir-birinə arxa-dayaq olduqlarını bildirib. Qeyd edib ki, Türkiyə Cümhuriyyəti 1991-ci ildə müstəqilliyini bərpa edən Azərbaycan dövlətinə öz dəstəyini, köməyini əsirgəməyib. Türkiyə bir dövlət olaraq bütün beynəlxalq təşkilatları Azərbaycan torpaqlarını işğal etmiş Ermənistanı işğalçı dövlət kimi tanımağa çağırıb. Vətən müharibəsində Türkiyə bütün dünyaya Azərbaycanın yanında olduğunu bəyan etdi. Azərbaycan öz hərbi gücü ilə torpaqlarını işğaldan azad etdi. Türkiyənin siyasi və mənəvi dəstəyi isə hadisələrin gedişatına kənar məkrli qüvvələrin müdaxiləsinin qarşısını aldı. Bütün bu dostluğun, qardaşlığın ən yüksək zirvəsi olaraq 2021-ci il iyunun 15-də Azərbaycanın mədəniyyət paytaxtı olan Şuşada iki dövlət arasında müttəfiqlik haqqında Şuşa Bəyannaməsi imzalandı. Bu sənəd Azərbaycanın müstəqilliyi dövründə iki qardaş ölkə arasında imzalanan, hərbi təhlükəsizlik məsələlərini, onun müxtəlif parametrlərini göstərən mühüm sənəddir. Məhz bu baxımdan Şuşa Bəyannaməsi tarixi önəm daşıyaraq, regionda yeni geosiyasi və geoiqtisadi münasibətlərin başlanğıcını qoydu.
Bəyannamənin imzalanmasının bütün dünyaya Azərbaycanla Türkiyənin dostluğu, qardaşlığı barədə bir mesaj olduğunu diqqətə çatdıran Kamilə Əliyeva deyib: “Şuşa şəhərində iki qardaş dövlətin ay-ulduzlu bayraqlarının birgə dalğalanması birliyimizi nümayiş etdirir. Şuşa Bəyannaməsi Azərbaycan və Türkiyə arasında bütün sahələrdə münasibətlərin davamlı inkişafına xidmət edəcək. Bəyannamədə Azərbaycan və Türkiyə arasında beynəlxalq aləmdə iqtisadi, siyasi, ordu quruculuğu, təhsil, ticarət sahələrində birgə əməkdaşlıq nəzərdə tutulur.
Hazırda dövlətimiz tərəfindən Qarabağda aparılan bərpa-yenidənqurma işlərində də Türkiyə yaxından iştirak edir, hər zaman olduğu kimi, Azərbaycanla həmrəyliyini nümayiş etdirir. Türkiyə ilə Azərbaycanın apardığı siyasət bölgədə sabitlik və sülhün bərqərar olması, xalqların birgə və rahat yaşamasına xidmət edir.
Şuşa Bəyannaməsinin regionda sülhə böyük yol açdığını, Qarabağda yaşayan erməni əsilli Azərbaycan vətəndaşlarının inteqrasiyası üçün əlavə imkanlar yaratdığını qeyd edən K.Əliyeva vurğulayıb ki, Bəyannamə Qarabağ və Şərqi Zəngəzur üçün iqtisadi münasibətlərin qurulmasına böyük dəstək olacaq. Azərbaycan və türk xalqlarının qardaş və dost kimi sıx tellərlə bir-birinə bağlanmasında xalqlarımızın böyük liderləri Mustafa Kamal Atatürk və Ulu Öndər Heydər Əliyevin böyük xidmətləri olmuşdur. XX əsrin əvvəllərində Atatürkün "Azərbaycanın sevinci sevincimiz, kədəri kədərimizdir", əsrin sonlarında Heydər Əliyevin "Azərbaycan və Türkiyə bir millət iki dövlətdir" kəlamları xalqlarımızın bir-birinə ürəkdən necə bağlı olduğunun sübutudur”.
Deputatın sözlərinə görə, artıq reallığa çevrilən Zəngəzur dəhlizi Azərbaycanla Türkiyəni dəmir yolu və avtomobil yolu ilə birləşdirəcək. Şuşa Bəyannaməsi həm Azərbaycan, həm də Türkiyənin gələcəkdə daha güclü və qüdrətli dövlətlərə çevrilməsinə böyük təkan verəcək.
“Azərbaycan Prezidenti İlham Əliyev və Türkiyə Cümhuriyyətinin Prezidenti Rəcəb Tayyib Ərdoğanın şəxsi dostluq və qardaşlıq münasibətləri ölkələrimizlə yanaşı, bütün türkdilli dövlətlərin də birləşməsinə, eləcə də sıx siyasi, iqtisadi əlaqələrin ən yüksək səviyyəyə çatmasına böyük təkan verir. Rəcəb Tayyib Ərdoğanın Prezident seçiləndən sonra ilk səfərini Azərbaycana etməsi ölkələrimiz arasındakı münasibətlərin dərinliyindən, bizi bir-birimizə bağlayan qardaşlıq tellərinin möhkəmliyindən xəbər verir. Bu, həm də bizə dost olan və olmayan ölkələrə, onların liderlərinə mesajdır”, - deyə Kamilə Əliyeva fikirlərini yekunlaşdırıb.
Bölmənin digər xəbərləri
