Litva nəqliyyat və İKT sahəsində Azərbaycanla əməkdaşlığın genişləndirilməsində maraqlıdır
Vilnüs, 29 iyun, AZƏRTAC
Litva nəqliyyat və İKT sahəsində Azərbaycanla əməkdaşlığın genişləndirilməsində maraqlıdır. Litvanın nəqliyyat və kommunikasiya naziri Rimantas Sinkyaviçyus bu fikri AZƏRTAC-ın xüsusi müxbirinə müsahibəsində söyləyib. R.Sinkyaviçyus deyib: “Biz şəhər və kənd yerləri arasında rəqəmsal qeyri-bərabərliyin azaldılması üzrə elektron kommunikasiyalar sahəsində Avropa İttifaqında nümunəvi hesab edilən iri layihələrin reallaşdırılması təcrübəsini bundan sonra da bölüşməyə hazırıq”.
Nazir TASİM (Transavrasiya Yüksək Sürətli İnformasiya Magistralı) layihəsinin sürətləndirilməsində Litvanın maraqlı olduğunu bildirib. Azərbaycanın da fəal iştirak etdiyi bu layihənin məqsədi Qərbi Avropa və Şərqi Asiya ölkələrindən keçən transmilli lifli-optik xətt çəkilməsidir.
R.Sinkyaviçyusun fikrincə, Litvanın ictimai sektorda elektron xidmətlər yaradılması sahəsində təcrübəsi də Azərbaycan üçün maraqlı ola bilər. Nazir bildirib ki, Litva elektron ictimai-inzibati xidmətlər sahəsində tərəqqi baxımından Aİ ölkələri arasında liderlərdən biridir. Litvanın DocLogix şirkəti “Azərbaycan Respublikasında G-Cloud bazasında vahid elektron sənəd dövriyyəsi” layihəsinin reallaşdırılması çərçivəsində öz xidmətlərini təklif edir və əməkdaşlığın uğurla davam etdiriləcəyinə ümid bəsləyir.
Nazir diqqətə çatdırıb ki, Litvanın İKT şirkətləri Azərbaycana maliyyə sektoru, energetika və elektron hökumət sahəsində müvafiq həllər, habelə gəmi agentlərindən və ekspeditorlardan başlamış, stividorlarına və Dövlət Dəniz Limanının müdiriyyətinə qədər dəniz limanının bütün iştirakçıları üçün həllər təklif edə bilərlər. Nazirin sözlərinə görə, ölkələrimiz arasında əməkdaşlığın mümkün sahələrindən biri də strateji dövlət resursu olan radiotezliklərindən səmərəli istifadə edilməsidir.
R.Sinkyaviçyus deyib: “Qeyd etmək lazımdır ki, “Azərpoçt” MMC və “Lietuvos pastas” səhmdar cəmiyyəti SC/STEFİ sistemi vasitəsilə elektron pul köçürmələrinin təşkilində əməkdaşlıq edirlər. 2015-ci il aprelin 1-də iki ölkənin poçt təşkilatları arasında müvafiq müqavilə imzalanıb.
Nazir R.Sinkyaviçyus nəqliyyat, avtomobil dəhlizlərinin və aviaaxınların inkişafı sahəsində əməkdaşlıq məsələsinə də toxunaraq bildirib ki, ölkələrimiz yaxın gələcəkdə avtomobil daşımaları sahəsində hökumətlərarası müqavilə imzalamağı planlaşdırırlar. Nazir qeyd edib ki, yaxşı inkişaf etmiş nəqliyyat infrastrukturuna və logistika mərkəzləri şəbəkəsinə malik olan Litva Azərbaycan yüklərinin Avropa və Skandinaviya ölkələrinə təhlükəsiz, sürətli və ucuz daşınmasını təklif edə bilər. Sevindirici haldır ki, Azərbaycan ilə Litva arasında əmtəə dövriyyəsinin artması litvalı və azərbaycanlı avtodaşıyıcılar tərəfindən daşımaların həcminin artmasına gətirib çıxarır.
Nazir onu da diqqətə çatdırıb ki, Baltik dənizinin ən Şimal hissəsində donmayan liman olan Klaypeda limanı öz müasirliyi və səmərəli işləməsi sayəsində Azərbaycan yüklərinin Avropaya və Skandinaviya ölkələrinə təhlükəsiz, sürətli və qənaətlə daşınması üçün böyük imkanlar yarada bilər. Neft, həmçinin taxıl və digər kənd təsərrüfatı məhsullarının daşınması xüsusi maraq doğurur. Son beş ildə Klaypeda limanının infrastrukturuna sanballı sərmayələr qoyulması sayəsində limanda bu məhsulların boşaldılması və yenidən yüklənməsi imkanları xeyli artıb.
Litvalı nazir deyib: “Kombinə edilmiş “Vikinq” nəqliyyat layihəsinə Azərbaycan Dəmir Yollarının da qoşulması bizi çox sevindirir. Bu, Litva, Ukrayna və Belarus dəmir yollarını, Klaypeda, İliçevsk və Odessa stividor şirkətlərinin və limanlarının birgə layihəsidir. Ukrayna, Belarus və Litva ərazisindən keçən marşrut Baltik regionundakı bir sıra dəniz konteyner və kontreyler xətlərini Qara dənizin, Aralıq dənizinin və Xəzər dənizinin analoji sistemi ilə birləşdirir. Layihə daşımaların vahid tarif üzrə həyata keçirilməsinə imkan verir.
Litvadan aviasiya marşrutlarının genişləndirilməsində maraqlı olduğunu bildirən Rimantas Sinkyaviçyus Azərbaycan Respublikası ilə Litva Respublikası arasında birbaşa müntəzəm hava yolu açılmasını prioritet istiqamətlərdən biri adlandırıb.
Nazir Bakı-Tbilisi-Qars dəmir yolunun Litva üçün əhəmiyyətini də vurğulayaraq bildirib ki, bu xətt Çinin cənub yolunun mühüm hissəsi və Rusiya ərazisindən keçməklə malların daşınması üçün potensial alternativ variantlardan biridir.
2014-cü ilin payızında Azərbaycan paytaxtında olmuş litvalı nazir AZƏRTAC-a müsahibəsində Bakı haqqında təəssüratlarını bölüşüb. R.Sinkyaviçyus deyib: “Bakı-Tbilisi-Qars dəmir yolu - tarixi Böyük İpək Yolunun inkişafı üçün yeni imkanlar” mövzusunda beynəlxalq konfrans çərçivəsində biz Azərbaycanın nəqliyyat naziri Ziya Məmmədovla hər iki dövlət üçün əhəmiyyətli olan bir sıra məsələləri müzakirə etdik. Bakıda məni çox yaxşı qəbul etdilər. Sizin gözəl, müasir şəhəriniz, səmimi və xeyirxah insanlar mənə çox xoş təsir bağışladı”.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
