Liviya sahilləri yaxınlığında Rusiya gəmisi batıb
Qahirə, 4 mart, AZƏRTAC
Bu gün Rusiyaya məxsus qazdaşıyan tanker Liviya sahilləri yaxınlığında batıb. Misirə doğru hərəkət etdiyi bildirilən gəmidə güclü yanğın baş verib.
AZƏRTAC “Əl-Ərəbiyyə” telekanalına istinadla xəbər verir ki, Liviya Axtarış və Xilasetmə Əməliyyatlarının Koordinasiya Mərkəzinə “Arktik Meta Qaz” tankerində qəfil partlayışlar və ardınca güclü yanğın baş verməsi ilə bağlı həyəcan siqnalı daxil olub. Daha sonra gəmi batıb. Hadisə Sirt dəniz limanından şimalda, təxminən 130 dəniz mili məsafədə baş verib.
Telekanalın məlumatına görə, tanker təxminən 62 min ton mayeləşdirilmiş təbii qaz yükü ilə Rusiyanın Murmansk limanından Misirin Port-Səid limanına doğru hərəkət edirmiş. 30 nəfərdən ibarət ekipaj xilas edilib və onların sağlamlıq vəziyyəti qənaətbəxşdir.
Misirin Neft və Mədən Ehtiyatları Nazirliyi isə gəminin Misir limanına doğru hərəkət etdiyi barədə xəbərləri təkzib edib. Nazirliyin bəyanatında bildirilib ki, gəmidə daşınan LNG-nin Misirin qazla təminatı ilə əlaqəsi yoxdur.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
