London metrosunda tətil şəhər iqtisadiyyatına 230 milyon funt sterlinq zərər vura bilər
London, 9 sentyabr, AZƏRTAC
Londonda nəqliyyat işçilərinin tətili şəhər iqtisadiyyatına ağır təsir göstərir.
AZƏRTAC “Independent”ə istinadla xəbər verir ki, iqtisadçılar dəmir yolu, dənizçilik və nəqliyyat həmkarlar ittifaqının keçirdiyi tətilin paytaxta 230 milyon funt sterlinqə qədər zərər vura biləcəyini qeyd ediblər.
Tətil bazar günü başlayıb, lakin əsas təsirini bazar ertəsi səhər saatlarında göstərib. Metro xətlərində xidmətin məhdudlaşdırılması nəticəsində minlərlə sakin işə getmək üçün avtobus, velosiped və şəxsi avtomobillərdən istifadə edib. Bu isə həm tıxacların, həm də gediş-gəliş vaxtının artmasına səbəb olub.
Məsələdən ən çox zərər görən isə kiçik bizneslərdir. Adətən nahar saatlarında müştərilərlə dolu olan kafelər və restoranlar bu gün ciddi müştəri azlığı ilə üzləşiblər. Şəhər biznes liderləri tətili pərakəndə satışa ağır zərbə adlandırıb və bu addımın həm turistlər, həm də sərmayəçilər üçün mənfi mesaj verdiyini bildiriblər.
Baş nazir Kir Starmerin sözçüsü açıqlama verərək RMT həmkarlar ittifaqını və London Nəqliyyat İdarəsini danışıqları bərpa etməyə və mübahisəni həll edərək tətili dayandırmağa çağırıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
