Londonda Dünya turizm sərgisi açılır
Bakı, 4 noyabr (AZƏRTAC). “World Travel Market” sərgisi 2013-cü ildə texnologiyalara, lüks dərəcəli turizmə, biznes-turizmə, habelə inkişaf etməkdə olan ölkələrdə turizm sənayesinin möhkəmlənməsinə diqqətin artdığını göstərəcəkdir.
Ənənə üzrə tədbir Londonun şərqində Doklends rayonunda “ExCel” sərgi mərkəzində keçiriləcək və dörd gün davam edəcəkdir. Sərgi sırf peşəkarlar üçün nəzərdə tutulsa da və geniş tamaşaçı kütləsi sərgiyə buraxılmasa da “WTM” dünya turizm sənayesində çox böyük hadisə hesab olunur.
Keçən il sərgidə bağlanmış sövdələşmələrin və kontraktların həcmi iki milyard funt-sterlinq təşkil etmişdir və bu rəqəm ildən-ilə artır. Bu il “WTM” sərgisində 184 ölkədən və regionlardan gətirilmiş 5 min eksponat nümayiş etdiriləcəkdir. Sərgiyə təqribən 50 min adam gələcəkdir.
“WTM” çərçivəsində yüzlərlə tədbir və çıxış təşkil olunur. Çərşənbə axşamı BMT-nin Dünya Turizm Təşkilatının (“UNWTO”) üzvü olan ölkələrin turizm nazirlərinin konfransı keçiriləcəkdir. Konfransın əsas mövzuları turizm biznesi baxımından aviadaşıyıcıların fəaliyyəti, nəqliyyat infrastrukturunun inkişafı və viza məsələləri olacaqdır.
Əvvəllər olduğu kimi, bu yarmarkanın da proqramına bundan əvvəlki illərdə özünü uğurla doğrultmuş Dünya Məsul Turizm Günü (6 noyabr), tarixi dəyərləri və təbiəti qoruyan ekoloji turizm, turizm yerlərinin bərpası mexanizmləri, yerli əhaliyə hörmət məsələləri daxil edilmişdir.
Sərgini təşkil edən RTE şirkətinin başçısı Fiona Ceffri demişdir: “Turizm sahəsindəki texnologiyalara, lüks turizmə və biznes-səfərlərə marağın artması həm sərginin iştirakçıları, həm də sərgiyə gələnlər üçün imkanları artıracaqdır. “WTM” sərgisində texnologiyalar mövzusu son bir neçə ildə çox uğurlu mövzu olmuşdur, buna görə də sərgi çərçivəsində ayrıca tədbir statusu bu meylin təbii davamıdır”. O, sözünə əlavə edib demişdir ki, texnologiya sərgisi “WTM” sərgisi kimi dörd gün davam edəcəkdir.
O həmçinin qeyd etmişdir ki, turizm sənayesinin lüks seqmenti iqtisadi böhrana daha davamlı olmuşdur və bütün dünyada inkişaf etməkdədir.
Bu il texnologiya sərgisi çərçivəsində “Google” və “Facebook” şirkətlərinin yüksək vəzifəli nümayəndələrinin çıxışları gözlənilir.
“Facebook” şirkətinin Turizm şöbəsinin başçısı Li Makkeyb səmərəli reklam platforması kimi sosial şəbəkədən, “Google” şirkətinin Turizm operatorları şöbəsinin başçısı Sara Makdonald isə turizm təşkilatları ilə şirkətin apardığı işdən danışacaqdır.
Bölmənin digər xəbərləri
