“Lütfi Zadənin qeyri-səlis məntiq nəzəriyyəsi və onun təhsilə tətbiqi” mövzusunda vebinar
Bakı, 9 iyun, AZƏRTAC
Təhsil İnstitutu dünya şöhrətli alim, qeyri-səlis məntiq nəzəriyyəsinin banisi Lütfi Zadənin anadan olmasının 100 illiyinə həsr edilən “Lütfi Zadənin qeyri-səlis məntiq nəzəriyyəsi və onun təhsilə tətbiqi” mövzusunda vebinar keçirib.
İnstitutdan AZƏRTAC-a bildirilib ki, vebinarda spiker qismində Elmi-pedaqoji tədqiqatlar mərkəzinin Təhsilin nəzəriyyəsi və tarixi şöbəsinin müdiri, professor İntiqam Cəbrayılov çıxış edib. Tədbirin moderatoru isə Elmi-pedaqoji tədqiqatlar mərkəzinin direktoru İlham Cavadov olub.
İ.Cəbrayılov görkəmli alim Lütfi Zadənin həyat və yaradıcılığı, fundamental nəzəriyyələri haqqında məruzə edib. Məruzədə görkəmli alimin qeyri-səlis məntiq nəzəriyyəsi geniş əhatə olunub. Bu nəzəriyyənin elmin bir çox sahələrinə verdiyi töhfələr haqqında danışan spiker nəzəriyyənin mahiyyətinin həm də onun tolerantlığında olmasını vurğulayıb. Lütfi Zadənin qeyri-səlis məntiq nəzəriyyəsində konfliktlərin həll olunması, həqiqətlərin aşkarlanması, hesablamaların dəqiqliyi kimi bir sıra mühüm məqamların öz əksini tapdığı qeyd olunub. Bildirilib ki, ABŞ, Yaponiya və dünyanın bir sıra ölkələrinin böyük şirkətlərinin, məhsullarının, sənaye proseslərinin idarə olunmasında bu nəzəriyyədən istifadə olunur.
Daha sonra İ.Cəbrayılov Lütfi Zadənin ideyalarının təhsilə tətbiqi və gələcək hədəflər haqqında fikirlərini bildirib. Süni intellekt və texnologiyalar əsrində təhsilin yeni texnologiyalar əsasında inkişafı, təhsilin məzmununda Lütfi Zadənin ideyalarının təcəssümü, proqram və dərsliklərdə bu ideyaların daha dərindən öyrədilməsi imkanlarının yaradılmasının əhəmiyyəti qeyd olunub. Eyni zamanda, fakt, hadisə və proseslərin təhlilində alimin ideyalarına əsaslanılması, onun irsinin elmi-pedaqoji araşdırılması, qiymətləndirmə sistemində onun nəzəriyyəsindən istifadə olunmasının vacibliyi bildirilib.
Naxçıvan Müəllimlər İnstitutunun elmi işlər üzrə prorektoru, professor Yaqub Məmmədov, Təhsil İnstitutunun direktor müavini, dosent, Əməkdar müəllim Ənvər Abbasov, elmi katib, professor Akif Abbasov və digərləri görkəmli alim Lütfi Zadənin yaradıcılığı haqqında fikirlərini bildiriblər.
Tədbirin sonunda İ.Cəbrayılov vebinar iştirakçılarının suallarını cavablandırıb.
Vebinarda 100-ə yaxın ali və orta ixtisas təhsili müəssisələrinin professor-müəllim heyəti, tədqiqatçı, doktorant və dissertant, magistr, məktəb rəhbəri və digər pedaqoji sahələrdə çalışan şəxs iştirak ediblər.
Bölmənin digər xəbərləri
