Macarıstan Şanxay Əməkdaşlıq Təşkilatı ilə əməkdaşlığı gücləndirir
Budapeşt, 4 sentyabr, AZƏRTAC
Macarıstan Avrasiya ölkələri ilə iqtisadi və diplomatik əlaqələri genişləndirmək məqsədilə Şanxay Əməkdaşlıq Təşkilatının (ŞƏT) fəaliyyətində iştirakını gücləndirir.
AZƏRTAC bu Avropa ölkəsinin Xarici İşlər Nazirliyinə istinadla xəbər verir ki, Budapeşt bu təşkilatı energetika, nəqliyyat, rəqəmsal texnologiyalar və təhsil sahələrində əməkdaşlığın inkişafı üçün mühüm platforma olaraq görür.
Macarıstanın ŞƏT-ə marağı ölkəyə infrastruktur və ticarət sahəsində təşkilatın çoxtərəfli layihələrində və forumlarında iştirak imkanı yaradıb. Hökumət nümayəndələrinin sözlərinə görə, ŞƏT ilə əməkdaşlıq xarici iqtisadi əlaqələri şaxələndirməyə və ənənəvi bazarlardan asılılığı azaltmağa şərait yaradacaq.
Mütəxəssislər bildirirlər ki, Macarıstan “Şərqə tərəf açılış” siyasətini fəal şəkildə həyata keçirərək Çin, Rusiya və Mərkəzi Asiya ölkələri ilə münasibətlər qurur. Xüsusilə, enerji təhlükəsizliyi sahəsində birgə layihələr – karbohidrogenlərin tədarükü və yaşıl texnologiyaların inkişafı məsələləri müzakirə olunur.
Macarıstan diplomatları vurğulayırlar ki, ŞƏT ilə əməkdaşlıq praqmatik xarakter daşıyır və qarşılıqlı faydanın gücləndirilməsinə yönəlib. Bununla yanaşı, müşahidəçilərin qeyd etdiyinə görə, Budapeştin bu fəallığı Avropa İttifaqında mübahisələrə səbəb olur, çünki Rusiya və Çinlə münasibətlər hələ də həssas mövzu olaraq qalır.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
