Macarıstanda Asiya pələng ağcaqanadına qarşı kimyəvi mübarizə genişləndirilir
Budapeşt, 7 iyul, AZƏRTAC
Macarıstanda Asiya pələng ağcaqanadının yayılmasının qarşısını almaq üçün bu həftə genişmiqyaslı kimyəvi dezinfeksiya tədbirləri həyata keçiriləcək.
AZƏRTAC xəbər verir ki, ölkənin Fövqəladə Halların İdarə Edilməsi Baş İdarəsinin məlumatına əsasən, Budapeştin III və IV rayonları da daxil olmaqla, 151 yaşayış məntəqəsində ümumilikdə 31,6 min hektar ərazidə müvafiq işlər görüləcək. Çiləmə tədbirləri axşam və gecə saatlarında xüsusi avadanlıqla təchiz edilmiş avtomobillər vasitəsilə aparılacaq. Rəsmilər istifadə olunacaq preparatın arılar, insanlar və ev heyvanları üçün təhlükə yaratmadığını bildiriblər.
Mütəxəssislərin sözlərinə görə, invaziv Asiya pələng ağcaqanadı son illərdə ölkənin bir çox bölgələrində sürətlə yayılıb. Bu növ denge, Zika, çikunqunya və Qərbi Nil virusu kimi təhlükəli xəstəliklərin daşıyıcısı hesab olunur, həmçinin itlər üçün təhlükəli parazitləri də yaya bilir.
Bölmənin digər xəbərləri
