Macarıstanda seçkiqabağı siyasi gərginlik artır
Budapeşt, 6 yanvar, AZƏRTAC
Macarıstanda Baş nazir Viktor Orban ilə müxalif “Tisa” partiyasının lideri Peter Madyar arasında seçkiqabağı ictimai əhvali-ruhiyyəyə nəzarət uğrunda siyasi mübarizə kəskinləşir.
AZƏRTAC xəbər verir ki, analitiklərin qeyd etdiklərinə görə, ötən ilin sonu və yeni ilin əvvəli həm klassik seçki kampaniyasının başlanğıcı, həm də artıq bir neçə aydır davam edən fasiləsiz qarşıdurmanın növbəti mərhələsi kimi səciyyələnir. Dekabrın son günlərində və yanvarın ilk günlərində əsas siyasi oyunçular, demək olar, sinxron şəkildə müsahibələr, çıxışlar və mətbuat konfransları ilə gündəmə gəliblər.
Viktor Orban ilin yekunlarına həsr olunmuş müsahibə verərək beynəlxalq mətbuat konfransı keçirib. Peter Madyar isə buna Yeni il müraciəti və açıq ictimai tədbirlə cavab verib. Beləliklə, hər iki siyasətçi medianın diqqət mərkəzində qalmaq üçün təşəbbüsü bir gün belə əldən verməməyə çalışır. Ekspertlərin fikrincə, tərəflər arasında gündəmi nəzarətdə saxlamaq uğrunda məqsədyönlü və şüurlu “tayminq müharibəsi” gedir.
Analitiklərin qənaətinə görə, Orban FİDES – Macarıstan Vətəndaş Birliyi ilə “Tisa” hərəkatını qarşı-qarşıya qoymaqla seçkiqabağı ritorikanı daha da sərtləşdirir. Peter Madyar isə özünü alternativ Baş nazir kimi təqdim etməyə çalışsa da, tez-tez mediaya ünvanladığı emosional və kəskin açıqlamalarla diqqət çəkir.
Hər bir halda qarşıdan gələn aprel seçkiləri ərəfəsində növbəti üç ay Macarıstan ictimaiyyəti üçün olduqca gərgin və dinamik keçəcək.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
