Macarıstanın neft-kimya sektoruna yeni zavod əlavə olunacaq
Budapeşt, 1 oktyabr, AZƏRTAC
Macarıstanın Tissauyvaroş şəhərində polispirt istehsal edən yeni zavod tikiləcək. AZƏRTAC xəbər verir ki, bu günlərdə həmin müəssisənin təməlqoyma mərasimi keçirilib.
Polispirtlər həm də “poliollar” adı ilə məşhurdur. Bu məhsul növünün istehsalı yanacaq-energetika sektoruna, daha dəqiq desək, neft-kimya sənayesinə aiddir. Ona görə də bu xəbər iqtisadiyyatın “hərəkətverici qüvvəsi” energetika olan ölkələri, o cümlədən Azərbaycanı da maraqlandıra bilər.
Tissauyvaroşda zavod tikintisi 1,5 milyard avroya başa gələcək. Gözlənildiyinə görə, 2021-ci ilə qədər istifadəyə veriləcək bu zavod Macarıstanın energetika nəhəngi sayılan MOL şirkətinin mülkiyyəti olacaq. Onun tərəfdaşı Almaniyanın Tissenkrupp konsernidir.
Maliyyə naziri Mixay Varqanın timsalında Macarıstan hökuməti bu layihəni dəstəkləmək üçün təqribən 130 milyon avro məbləğində yardım ayrılacağını elan edib. Bu da təəccüblü deyil, çünki gözlənildiyinə görə yeni zavod istifadəyə veriləndən sonra orada 200 yeni iş yeri açılacaq.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
