AZƏRTAC xəbər verir ki, oktyabrın 7-də Prezident İlham Əliyev Masallı şəhərində rayon ictimaiyyətinin nümayəndələri ilə görüşmüşdür.

Rayonun Digah kənd orta məktəbinin direktoru NAİLƏ ƏSƏDULLAYEVA dövlətimizin başçısına müraciətlə dedi:

- Möhtərəm Prezident, sevimli Mehriban xanım xoş gəlmisiniz. Azərbaycanın cənub bölgəsinin dilbər guşəsi Masallıda sizləri salamlayırıq. Qədəmləriniz mübarək olsun. Deyirlər, rəhbərin ayaq qoyduğu torpaq bərəkət gətirər. Arzu edirik ki, Sizin bugünkü bu gəlişiniz də Masallı torpağına bərəkət, xalqımıza ruzi gətirsin. İnanın, bu gün biz hamımız sevinirik, bütün Masallı sakinləri sevinir. Hər kəs Sizi özünün qonağı hiss edir. Sizi sevir, doğma bir şəxs kimi görür.

Sizin bölgələrə səfərlərinizi böyük sevinc, ruh yüksəkliyi ilə

izləyirik və Azərbaycanımızın bugünkü inkişafını görüb fəxr edirik. Bir də ona görə fəxr edirik ki, Azərbaycanımıza, xalqımıza Sizin kimi savadlı, Vətəninə, xalqına sadiq bir lider rəhbərlik edir. Möhtərəm Prezident, bu gün elə bir ailə, elə bir ev yoxdur ki, orada Sizin adınız hörmətlə çəkilməsin. Həm Azərbaycana xidmət edən bir rəhbər kimi, həm də adı böyük hərflə yazılan bir şəxsiyyət kimi Sizə hamının hörməti vardır. Bölgələrə səfərinizi izləyirik və görürük ki, hər bir yerdə gözoxşayan abadlıq işləri gedir. Bizim Masallı da bu işlərdən kənarda qalmır. Sizinlə görüşdüyümüz Heydər Əliyev adına park öz gözəlliyi ilə göz oxşayır. Burada bizim sakinlər istirahətlərini keçirirlər. Heydər Əliyevə ucaldılan bu heykəl bizim sakinlərin ona olan hörmətini, sevgisini göstərir. Gənclərimiz ailə qurarkən bu heykəlin qarşısına gəlir, ehtiram əlaməti olaraq gül-çiçək dəstələri qoyurlar. Rayonumuzda səhiyyədə, təhsildə böyük irəliləyiş vardır. Zərifə Əliyeva adına sağlamlıq ocağının açılması ilə, əlbəttə ki, təkcə Masallı rayonunun sakinləri deyil, bütün bölgədən də buraya müayinə və müalicə olunmağa gələcəklər. Açılan hər bir təhsil, səhiyyə ocağı, hər bir müəssisə yeni avadanlıqla da təmin olunur. Masallının, onun əhalisinin sosial problemləri həll edilir. Masallıya dayanıqlı elektrik enerjisi verilir, kəndlərdə qaz problemi həll olunur, yollarımız, şəhərdaxili küçələrimiz abadlaşır. Əlbəttə bu, böyük irəliləyişdir. Hər məhəlləyə içməli su xətləri çəkilmişdir.

Amma bir təhsil işçisi kimi, əlbəttə ki, bizi daha çox bu sahədəki uğurlar sevindirir, daha əzmlə işləməyə ruhlandırır. Dövlət xətti ilə, Heydər Əliyev Fondunun xətti ilə Masallıda iki il ərzində 10 məktəb binası tikilmiş, hamısı yeni, müasir avadanlıqla təmin edilmişdir. Sevimli Mehriban xanım, əlbəttə ki, bu işdə sizin də böyük əməyiniz vardır. Sizin incə zövqünüz, Vətənə, xalqa olan sədaqətiniz bir daha sübut edir ki, bizim Sara Xatunlar, Natəvanlar müasir dövrdə də yaşayırlar. Sizin bu fəaliyyətiniz biz qadınlara böyük örnəkdir, nümunədir. Buna görə biz sizə dərin təşəkkür edirik və qoy, Allah-Taala sizi həmişə sevindirsin.

Möhtərəm Prezident, “İlin ən yaxşı müəllimi”, “İlin ən yaxşı məktəbi” müsabiqəsinin təşkili, əmək haqlarımızın artırılması, “Müəllimlər yaxşı məktəblərdə çalışmalıdırlar, şagirdlər yaxşı məktəblərdə oxumalıdırlar” sözləriniz gələcəyə qayğının təzahürüdür. Bizi daha əzmlə işləməyə sövq edir. Qadınların III qurultayı ərəfəsində bir çox qadınlarımız mükafatlara layiq görülmüşdür, onların arasında bizim rayondan da 2 qadın vardır. “Tərəqqi” medalına layiq görülməyim məni bir daha sevindirir və məsuliyyət hissimi daha çox artırır. İnanıram və bilirəm ki, bu, təkcə mənim əməyimə deyil, Masallının ziyalı qadınlarına verilən qiymətdir. Buna görə mən Sizə bütün qadınlarımız, ziyalılarımız adından bir daha təşəkkürümü bildirirəm.

Əgər fikir vermisinizsə, Masallının girəcəyində 2 doqquzmərtəbəli bina tikilir. Belə demək mümkünsə, bunlar Masallıda ilk göydələnlərdir. Bu, əlbəttə Masallı sakinlərinin mənzillərə olan ehtiyacını ödəyir. Hansı sahəyə baxırıqsa, insan amilinə, insana xidmətə, xalqın rifahına yönələn xidmətinizi görürük. Bütün bunlara görə Sizə təşəkkür edirik. Mən bir daha Masallı sakinləri adından Sizə “Xoş gəlmisiniz!” deyir, cansağlığı arzulayıram.

Mehriban xanım, siz də ailənizlə birlikdə xoşbəxt olasınız. Sizə Azərbaycanın rifahı naminə gələcək işlərinizdə uğurlar diləyirəm. Çox sağ olun.

İLHAM ƏLİYEV: Sağ olun, təşəkkür edirəm. Mən çox şadam ki, Masallı çox sürətlə inkişaf edir, gözəlləşir, abadlaşır. Siz, burada yaşayan insanlar bunu daha yaxşı bilirsiniz və mən də bunu görürəm, əvvəllər də olmuşam. Burada baş verən dəyişikliklər, əlbəttə ki, Masallı rayonunun hər bir sakinini və hər bir vətəndaşı sevindirir. Bu gözəl, abadlaşan parklar, təmir olunan binalar, yeni tikilmiş hündürmərtəbəli binalar, məktəblər, tibb ocaqları - bütün bunlar insanlar üçündür, insanların yaxşı yaşaması üçün nəzərdə tutulubdur. Bütün bu gözəl işlər Azərbaycanın gücünü göstərir, ölkəmizin qüdrətini göstərir. Azərbaycan, sözün əsl mənasında, hərtərəfli inkişaf edir. Bizim inkişafımız təkcə statistik rəqəmlərlə ölçülmür. Halbuki, bu statistik rəqəmlər bizə imkan verir ki, biz maliyyə imkanlarımızı daha da genişləndirək və büdcə xərclərimizi sosial məsələlərin həllinə yönəldək. Amma bu irəliləyiş insanların yaşayış səviyyəsinin yaxşılaşmasında, abadlaşan şəhərlərdə, çəkilən yollarda, su xətlərində, bir sözlə, həm iqtisadi, həm də sosial məsələlərin həllində özünü göstərir. Bizim ölkəmiz son illər ərzində dünyada analoqu olmayan sürətlə inkişaf edibdir. Bunu həm biz görürük, həm də bütün dünya etiraf edir. Çox şadam ki, bütün bölgələrdə bu gözəl inkişaf meyilləri davam edir. Biz bunu Masallı rayonunun timsalında da görürük, sosial obyektlər, məktəblər tikilir. Bu gün biz Elmi Tədqiqat Göz Xəstəlikləri İnstitutunun filialını açacağıq. Bununla bərabər, yollar çəkilir, parklar salınır, içməli su xətti çəkilib və Masallı sakinlərini çox narahat edən məsələ öz həllini tapıbdır. Gələcəkdə, əlbəttə ki, bütün bu məsələlər öz həllini daha da böyük həcmdə tapacaqdır. Sosial məsələlərin həlli üçün güclü iqtisadi potensial lazımdır. Bunu da Azərbaycan dövləti yaradır. Həm uğurlu neft strategiyamızın davam etdirilməsi sahəsində, eyni zamanda, ölkəmizdə aparılan köklü iqtisadi islahatlar hesabına, özəl sektorun inkişafı hesabına. Biz bunu Masallı rayonunun timsalında da əyani şəkildə görürük ki, həm yerli iş adamları burada daha fəal işləyirlər, həm də dövlət xətti ilə yatırılan sərmayələr rayonun inkişafına növbəti təkan verəcəkdir. Bakı-Masallı-Astara avtomobil yolunun yeniləşməsi - bu, özlüyündə böyük bir təkanverici amil olacaqdır. Əlbəttə ki, bu, ilk növbədə, insanların rahatlığına xidmət edəcəkdir. Çünki Azərbaycan vətəndaşları yaxşı yollardan istifadə etməlidirlər. Digər tərəfdən, biznes, yerli sahibkarlıq inkişaf edəcək və beləliklə, hər bir bölgə, hər bir rayon özünəməxsus şəkildə, öz daxili potensialına istinad edərək, daha da sürətlə inkişaf edəcəkdir.

Nəzərə alsaq ki, Azərbaycan dövlətinin ildən-ilə artan iqtisadi potensialı artıq insan kapitalına çevrilir, əlbəttə ki, biz gələcəyə də çox nikbinliklə baxa bilərik. Çünki bu vaxta qədər istər iqtisadi, istər sənaye sektorunda, istər sosial sahədə nəzərdə tutulmuş bütün layihələr icra olunubdur. Regionların sosial-iqtisadi inkişafı Dövlət proqramında göstərilən bütün məsələlər öz həllini tapıb, özü də 2004-cü ildə nəzərdə tutulandan daha çox məsələ həll olunubdur. Növbəti beş il üçün yeni proqram hazırlanır. Bu proqram çərçivəsində bütün qalan problemlər öz həllini tapacaqdır. Nəinki rayon mərkəzlərinin, həm də bütün kəndlərin problemləri - kənd yolları, infrastruktur layihələri öz həllini tapacaqdır.

Biz beş il ərzində 1500 məktəb tikmişik, amma hələ ki, bu proses davam etməlidir. Hələ o qədər də yaxşı vəziyyətdə olmayan məktəblər var və təhsil işçiləri bunu bilirlər. Əlbəttə, beş il ərzində 1500 məktəbin tikintisi böyük, tarixi nailiyyətdir. Azərbaycanda məktəblərin ümumi sayı 4500-dür. Onun 30 faizini biz yeniləşdirdik. Amma bu proses növbəti illərdə davam etdiriləcəkdir.

İndi bizim iqtisadi imkanlarımız var. Azərbaycanın çox güclü beynəlxalq mövqeləri var. Ölkəmizin hörməti artır, təsiretmə imkanlarımız artır. Biz istənilən meyara görə bu bölgədə, sözün əsl mənasında, aparıcı dövlətik. Azərbaycan həm sosial, həm iqtisadi, həm də siyasi məsələlərin həlli işində müstəqil ölkə kimi uğurla çıxış edir. Əlbəttə, belə möhkəm iqtisadi zəmin əsasında biz insanları narahat edən bütün problemləri həll etməliyik.

Azərbaycanda çox güclü sosial siyasət aparılır: iqtisadi islahatlarla, bazar iqtisadiyyatı prinsiplərinə tam şəkildə keçməyimizlə bərabər, insanların sosial cəhətdən dəstəklənməsi, istər maaşların, pensiyaların artırılması, istərsə də ünvanlı sosial yardımın məbləğinin artırılması. İndi Azərbaycanda 500 minə qədər insan dövlət tərəfindən sosial müavinət alır. Yəni bu, dövlət tərəfindən insanlara birbaşa verilən ianədir. Nəyə görə?! Çünki o insanların buna ehtiyacı var. Çünki o insanlar hələ ki, həyatda özlərini tapa bilmirlər. Hələ ki, yaxşı iş ala bilməyiblər, yüksək maaş ala bilmirlər, onlar çətinlik çəkirlər. Bəzi yerlərdə, yəni sırf bazar iqtisadiyyatı prinsipi əsasında yaşayan ölkələrdə bu məsələlərə məhəl qoyulmur. Amma bizim üçün əsas nədir?! Azərbaycan xalqının yaxşı yaşaması. Bütün islahatlar, aparılan bütün siyasət bu məqsədi güdür. Həm ölkə güclənsin, - güclü ölkə öz vətəndaşlarını istənilən sahədə müdaifə etməyə qadirdir, - həm də insanlar daha da yaxşı yaşasınlar. Bax, sosial məsələlərin həlli bundan ibarətdir. İldən-ilə artırılan maaşlar və pensiyalar - onlar da bu məqsədi güdür. Əgər desəm ki, onların səviyyəsi bizi tam qane edir, elə deyil. Baxmayaraq ki, son illər ərzində bir neçə dəfə artırılıb, hələ ki, minimum əmək haqqı bizi qane edə bilməz. Amma biz bu istiqamətdə böyük addımlar atmışıq və əlbəttə ki, növbəti illərdə də həm orta aylıq əmək haqqı, həm minimum əmək haqqı artırılacaqdır. Bölgənin və keçmiş postsovet məkanının başqa ölkələri ilə müqayisədə Azərbaycan bu baxımdan ən qabaqcıl yerlərdən birini tutur. Amma biz özümüzü inkişaf etmiş ölkələrlə müqayisə etməliyik. Yəqin ki, bilirsiniz, mən dəfələrlə demişəm, Azərbaycan inkişaf etmiş ölkələrin sırasına daxil olmalıdır. “İnkişaf etmiş ölkələr” - bu, elə termindir ki, çox ölkəni əhatə etmir, çox məhdud sayda ölkə özünü belə hesab edə bilər. Amma bizim tam imkanımız var ki, o ölkələrin sıralarında olaq. Çünki çox güclü insan potensialımız var, intellektual potensialımız yüksəkdir.

Siz təhsildən söhbət açdınız, təsadüfi deyil ki, biz təhsil sahəsinə böyük diqqət göstəririk, çünki bu, bizim gələcəyimizdir. Bizim gələcəyimiz təhsillə bağlıdır. Uşaqlarımızın, gənc nəslin savadlı olması ilə bağlıdır. Yox, əgər bu olmasa, istənilən təbii sərvət nə qədər olursa-olsun, bunun heç bir əhəmiyyəti olmayacaqdır.

Digər tərəfdən, ölkəmizin təbii sərvətləri də var. Bu da Allahın hədiyyəsidir və biz bundan çox səmərəli şəkildə istifadə edirik. Bütün enerji məsələlərini həll etmişik. Azərbaycan növbəti onilliklər üçün özünün enerji təhlüksəziliyini təmin edib və başqa ölkələrin təhlükəsizliyinə öz töhfəsini verir.

Digər tərəfdən, düşünülmüş strategiya və siyasət, iqtisadi islahatlar, kənd təsərrüfatının inkişafı - bax, bu məsələlərə daha böyük diqqət göstərməliyik və göstəririk. Ərzaq təhlükəsizliyini təmin edəcəyik ki, Azərbaycan bütün lazım olan istehlak mallarını daxildə istehsal etsin.

Bizim müasirliyə doğru addımlarımız - Azərbaycan müasirləşir, amma digər tərəfdən, biz çox güclü milli ənənələr üzərində gələcəyə baxırıq. Bütün bunlar birlikdə həll olunur və regionlarda gedən bu gözəl dəyişikliklər əlbəttə ki, ölkəmizi gücləndirir. Mən istəyirəm ki, Azərbaycanın hər bir yerində yaxşı yaşamaq üçün ən yaxşı şərait olsun. Bax, Masallı rayonunun timsalında biz bunu görürük, bu irəliləyişi görürük. Növbəti illərdə əlavə vəsait ayrılacaq, proqramlarda əlavə məsələlər nəzərdə tutulacaq ki, rayonun bütün problemləri həll edilsin və həmişəki kimi, Masallı ən gözəl, qabaqcıl rayonlardan biri olsun. Bu işlərdə sizə uğurlar və yeni qələbələr arzulayıram. Sağ olun.

X X X

Dövlətimizin başçısı Böyük Vətən müharibəsi veteranı Atabala Hacıyev ilə görüşdü, ökəmizdə veteranlara çox böyük hörmət bəsləndiyini bildirdi, eyni zamanda, onların gənc nəsil üçün örnək olduğunu vurğuladı.

Veteranlara göstərilən diqqət və qayğıya görə təşəkkür edən Atabala Hacıyev Prezidentə işlərində uğurlar arzuladı.

Sonra Prezident İlham Əliyev görüş iştirakçıları ilə xatirə şəkli çəkdirdi.

######