“McLaren” Bakıda Konstruktorlar Kubokunu qazana bilər
Bakı, 9 sentyabr, AZƏRTAC
“McLaren” komandası bu il Formula 1 üzrə dünya çempionatında tam üstünlük nümayiş etdirir. Belə ki, 16 mərhələdən sonra Oskar Piastri və Lando Norris ümumilikdə 12 qələbə qazanıblar. Artıq heç kim şübhə etmir ki, Uokinqdən olan komanda mövsümün sonunda Konstruktorlar Kubokunun sahibi olacaq. Hətta gələn həftə Bakıda keçiriləcək mərhələdə “McLaren” riyazi cəhətdən özünə qələbəni təmin edə bilər. Bunun üçün isə bir neçə şərt yerinə yetirilməlidir.
AZƏRTAC xəbər verir ki, hazırda “McLaren” ən güclü rəqiblərindən olan “Ferrari”ni 337 xalla qabaqlayır. Azərbaycan Qran-Prisindən sonra sprintlər də nəzərə alınmaqla 346 xal oynanılacaq. Bununla da, Bakıda “McLaren” pilotları ümumilikdə “Ferrari” sürücülərindən 9 xal çox qazanmalıdırlar ki, mövsümün sonunda Skuderiyadan öndə olacaqları tam zəmanət altına alınsın.
Amma bu, yeganə şərt deyil. Belə ki, Bakıda “Ferrari”ni qabaqlamaqla yanaşı, “McLaren” “Mercedes”ə 12 və ya daha çox xal, “Red Bull Racing”ə isə 33 və ya daha çox xal uduzmamalıdır.
Bu şərtlər yerinə yetirilərsə, “McLaren” Azərbaycan Qran-Prisinin finişindən dərhal sonra mövsümün sonuna 7 mərhələ qalmış 2025-ci ilin Konstruktorlar Kubokunun qalibi olacaq. Bununla da komanda “Red Bull Racing”in əvvəlki rekordunu yeniləyəcək. 2023-cü ildə Maks Ferstappen və Serxio Peres mövsümün bitməsinə 6 yarış qalmış komandalarını titulla təmin etmişdilər.
Bölmənin digər xəbərləri
