Məbud Məhərəmmov: Müslüm Maqomayev ümumxalq sevgisinə baxmayaraq, sadə insan olaraq qalırdı
Bakı, 17 avqust, AZƏRTAC
Müslüm Maqomayev hələ erkən yaşlarından bir çox dinləyici üçün sadəcə sevimli müğənni deyil, bütöv bir dövrün səsi idi. Onun opera ariyalarını və estrada əsərlərini ifa etməsi ilk notlardan yadda qalırdı. Ümumittifaq miqyasında tanınmasına və bir neçə nəslin sevgisini qazanmasına baxmayaraq, gündəlik həyatında o, sadə, səmimi və xoşrəftar insan olaraq qalırdı.
AZƏRTAC xəbər verir ki, bunu görkəmli müğənni ilə bağlı xatirələrini bölüşən Azərbaycanın Xalq artisti Məbud Məhərəmmov deyib.
M.Məhərəmmov qeyd edib ki, hələ uşaqlıqdan Müslüm Maqomayevin yaradıcılığı onun həyatının bir hissəsinə çevrilib. O, müğənninin ifasında mahnılara və opera ariyalarına qulaq asdığını və həmin əsərləri özü də oxumağa çalışdığını xatırlayaraq deyib: “Mən balaca idim və bütün vaxtımı ona qulaq asmaqla keçirirdim. Valideynlərim tez-tez evdən gedir və mən qəfil küçəyə qaçmayım deyə evdə qapını kilidləyirdilər. Bizim nəfəsliyi olan pəncərəmiz var idi. Mən yuxarı qalxır, onu açır və “Knyaz İqor” operasından qəhrəmanın məşhur “Ah, mənə azadlıq verin, azadlıq verin” ariyasını oxuyurdum”. Müsahibimizin sözlərinə görə, uşaqlıqdan yaranan bu həvəs diqqətdən kənarda qalmırdı. Valideynləri evə qayıdanda qonşular onları zarafatla belə qarşılayırdılar: “Daha ona azadlıq verin! Ona azadlıq verin!”
Beləliklə, onun Maqomayevin ifasında eşitdiyi məşhur ariya öz uşaqlıq xatirələrinin bir hissəsinə çevrilib.
Müğənni ilə şəxsi ünsiyyətini xatırlayan M.Məhərəmmov xüsusilə də insani keyfiyyətlərini vurğulayıb. Onun sözlərinə görə, məşhur sənətçinin səhnə obrazının arxasında heç bir təkəbbür və ya özünün xüsusi statusunu nümayiş etdirmək istəyi yox idi.
“Müslüm Maqomayev tamamilə sadə insan idi, həmin o “ulduzluq”, “ulduz xəstəliyi” yox idi. Hamıya eyni cür yanaşan, hamı ilə çox yaxşı münasibət saxlayan tamamilə sadə insan idi”, - deyə o bildirib.
M.Məhərəmmov vurğulayıb ki, müğənninin böyük populyarlığı fonunda məhz bu sadəliyi xüsusilə yadda qalırdı. Maqomayev bütün ölkənin tanıdığı və sevdiyi bir insan idi, lakin ətrafındakılara münasibəti səmimi və xoşməramlı olaraq qalırdı.
Müslüm Maqomayevin yaradıcılıq irsindən danışan M.Məhərəmmov qeyd edib ki, müğənninin ifaları illər keçməsinə baxmayaraq, bu gün də dinlənilir.
Bölmənin digər xəbərləri
