Mədə xorasının müalicəsi üçün effektiv hidrojel hazırlanıb
Bakı, 5 sentyabr, AZƏRTAC
Çin və Avropanın materialşünasları mədə turşusunun təsirinə davamlı və həzm orqanlarının sağlam selikli qişasının xüsusiyyətlərinə malik olan hidrojel materialı hazırlayıblar. Alimlər “Cell Reports Physical Science” elmi jurnalında dərc olunan məqalədə yazırlar ki, bu inkişaf dərmanların çatdırılması və mədə xorası və reflüksün müalicəsi üçün istifadə edilə bilər.
AZƏRTAC xarici mediaya istinadla xəbər verir ki, bu hidrojel reflüks və mədə xoralarını müalicə etmək, həmçinin əməliyyatdan sonrakı yaraları zədələrdən qorumaq üçün istifadə oluna bilər. Maddə endoskoplar vasitəsilə xəstənin bədəninə minimal invaziv yolla çatdırıla bilər. Siçovullar və donuzlar üzərində aparılan təcrübələr göstərib ki, hidrojel təkcə toxumaların səthinə yaxşı yapışmır, həm də onların fəaliyyətini sürətləndirir.
Alimlər qeyd etdiyi kimi, həzm sisteminin bir çox xəstəliklərinin, o cümlədən qastrit-reflüks və mədə xorasının inkişafı qida borusunun, mədə və bağırsaqların selikli qişalarının və divarlarının zədələnməsi ilə müşayiət olunur ki, bu da xroniki iltihabın, xoraların yayılmasına gətirib çıxarır, xəstədə böyük narahatlıq yaradır. Bu zədələr uzun müddət davam edə, habelə mədə turşusu və həzm şirələrinin təsiri altında daha da pisləşə bilər. Problemi həll etmək üçün Çin və Avropa materialşünasları bu cür zədələri, eləcə də əməliyyatdan sonrakı yaraları həzm şirələrinin aqressiv komponentləri ilə təmasdan qoruya bilən yeni hidrojel materialı hazırlayıblar. Alimlər buna üç maddənin - ELR-IK24 zülalı, tannik turşusu və diizosiyanat sinfindən üzvi molekul olan HDI-nin birləşməsindən istifadə etməklə nail olublar.
Bölmənin digər xəbərləri
