Media: ABŞ-ın sabiq prezidenti Cozef Bayden çıxışı üçün 300 min dollar istəyir
Bakı, 18 aprel, AZƏRTAC
ABŞ-ın sabiq prezidenti Cozef Baydenin tədbirdəki çıxışı təşkilatçılara 300 min dollara başa gələcək.
AZƏRTAC xəbər verir ki, “New York Post” qəzeti bu barədə mənbələrinə istinadla məlumat yayıb.
Məlumata görə, Cozef Baydenin tələbləri siyahısına tədbirin başqa şəhərdə keçiriləcəyi təqdirdə uçuş üçün şəxsi təyyarə və beş köməkçisinin xidmət haqqının ödənilməsi də var.
ABŞ-ın sabiq dövlət başçısının istədiyi məbləğ 44-cü ABŞ lideri Barak Obamanın 2017-ci ildə Ağ evi tərk etdikdən sonra çıxışı üçün tələb etdiyi 400 min dollardan 25 faiz azdır.
Buna baxmayaraq Cozef Baydenin maraqlarını təmsil edən “Creative Artists Agency” agentliyi sabiq prezidentin natiqliyinə ehtiyac duyanları tapmaqda çətinlik çəkir.
Bu həftənin əvvəlində Cozef Bayden İllinoys ştatının Çikaqo şəhərində əlil insanlara hüquqi dəstək verən qeyri-hökumət təşkilatının konfransında çıxış edib. Bu, onun vəzifəsindən ayrıldıqdan sonra ictimaiyyət qarşısında ilk çıxışı olub.
Qeyd edək ki, 2021-ci ildən prezident postunu tutan 82 yaşlı Cozef Bayden 2025-ci il yanvarın 20-də Ağ evi Donald Trampa təhvil verib. Bayden prezidentlik müddəti boyunca ictimai çıxışlarında tez-tez səhvlər edib.
Bölmənin digər xəbərləri
